जोमसोम ।
नेपाल—चीन उत्तरी कोरलानाकामा अस्थायी पूर्वाधार निर्माण गरिएको छ । पूर्वाधार विकास कार्यालय मुस्ताङको सहयोगमा सुरक्षा निकायका लागि भौतिक संरचना तथा उद्दार केन्द्र निर्माण गरिएको हो ।

सुरक्षाकर्मीका लागि भुकम्प प्रतिरोधात्मक तथा वातावरणमैत्री ६ कोठे भौतिक संरचना निर्माण गरिएको कार्यालय सूचना अधिकारी इन्जिनीयर घनश्याम रोकामगरले जानकारी दिए ।

उपल्लो मुस्ताङीका लागि औपचारिक रुपमा व्यापारिक कारोवार खुला भएसँगै प्रदेश सरकारले पूर्वाधार निर्माणमा चाँसो दिएको हो ।

गत वर्ष जेठ १३ गते ४० लाख २५ हजार लागतमा निर्माण सेवा काठमान्डौंसँग ठेक्का सम्झौता भएको थियो ।

आपत्कालिन बासस्थान तथा उद्दार केन्द्र भवन निर्माण गर्न वातावरणमैत्री (प्रि—फाईप) एसवाई प्यानलको ६ कोठे भौतिक संरचना तयार भइसकेको कार्यालयका सूचना अधिकारी रोक्कामगरको भनाइ छ । भवनमा किचन कोठा, बैठक हल र ४ वटा अफिस कोठा, ट्वाईलेट र बाथरुम छन् ।

भवन निर्माणसँगै अप्ठेरो पर्दा सशस्त्र प्रहरी र नेपाल प्रहरीको टोलीलाई व्यवस्थापन गर्न सजिलो हुने बताइएको छ ।

कोरलानाका जाने पर्यटकका लागि पनि मौसम प्रतिकुल हुँदा ओत लाग्न सजिलो हुने लोमान्थाङ गाउँपालिकाका अध्यक्ष टसीनर्बु गुरुङले बताए । नाकासम्म खानेपानीको स्रोत पु¥याउने लक्ष्य रहेको अध्यक्ष गुरुङले सुनाए ।

‘नेपाल विद्युत प्राधिकरणको सहयोगमा बिजुली पुगेको छ, अब टेलिकमको सहयोगमा मोबाईल टावर पनि राख्ने योजनामा छौं,’ उनले भने ।

उत्तरी कोरलाक्षेत्रको आफ्नो तिब्बती भूमी लिजीमा चीन भन्सार, सुख्खाबन्दरगाह, ईमिग्रेसन र सुरक्षा पोष्ट लगायतका दर्जनौ ब्यापारिक प्रतिष्ठान भवन निर्माण गरिसकेको छ ।

चीनले कोरलानाकासम्म आफ्नो स्वामित्वमा पर्ने क्षेत्रमा दुई लेनको समृद्ध सडक तथा विद्युत र खानेपानी लगायतका सबै पूर्वाधार निर्माण गरेको छ ।

कोरलानाकाको चीनतर्फ ठुला ठुला भौतिक पूर्वाधार निर्माण भईसक्दा नेपालतर्फको क्षेत्र खुल्ला पठार खाली छ । यसअघि लोमान्थाङ गाउँपालिकाले नेचुङमा रहेको सशस्त्र प्रहरी बोर्डर आउट पोस्ट (बिओपी)संगको समन्वयमा राष्ट्रिय झन्डा गाडेको थियो ।

कोरलानाका खुल्ला हुनु पूर्व चिनले नेपाल पक्षलाई सुरक्षा निकाय बस्न मिल्ने ५ थान प्रि—फाईप कन्टेनर दिएको थियो । नाकाको नेपालतर्फ भन्सार लगायतका भौतिक संरचना निर्माण गर्न १ हजार रोपनी जग्गा मुस्ताङ भन्सार कार्यालयको नामा लालपूर्जा प्राप्ति भईसकेको छ ।

तर, कोरलानाकामा ३ वर्षअघि दीर्घकालिन भौतिक संरचना निर्माण गर्न डीपीआर सर्वे गरिएको भएपनि त्यसको प्रतिवेदन सार्वजनिक भएको छैन । चीनले कोरलानाकामा नेपाल पक्षको भौतिक संरचना निर्माण गरिदिने प्रस्ताव गरेपनि सररकारले त्यसको निर्णय गर्न सकेको छैन ।

कोरलानाकाको दजगजा क्षेत्रको दक्षिण १६ किमी यता भन्सार कार्यालयको जीर्ण भवनमा सशस्त्र प्रहरीको (बिओपी),नेपाल प्रहरी र भन्सारका कर्मचारी बस्ने गरेका छन् ।