म्यादे गाउँपालिकाद्वारा ९ विद्यालयमा सेनेटरी प्याडकाे व्यवस्था

समाधान संवाददाता २०७५ फागुन ६ गते १०:५४

कृष्ण न्यौपाने
दमौली

रजस्वला भएको समयमा छात्रालाई विद्यालय आउने वातावरण बनाउन तनहुँको म्याग्दे गाउँपालिकाले विद्यालयलाई सेनेटरी प्याड उपलब्ध गराएको छ । रजस्वला हुँदा विद्यालयमा गयल हुने प्रवृत्ति बढेपछि गाउँपालिकाले म्याग्देका ९ वटा विद्यालयमा सेनेटरी प्याड उपलब्ध गराएको हो ।

आधारभूत र माध्यमिक तहसम्म पढाई हुने ९ वटा विद्यालयमा प्याड वितरण गरिएको गाउँपालिकाका प्रमुख प्रशासकीय अधिकृत दयाराम तिवारीले जानकारी दिए । आधारभूत र माध्यमिक तहसहित कक्षा ११ र १२ मा ७ सय ५३ जना छात्राहरु अध्ययनरत छन् । उनीहरुका लागि ५ हजार प्याकेट सेनेटरी प्याड उपलब्ध गराएको तिवारीले बताए । उनले भने, ‘आगामी शैक्षिक सत्रसम्मका लागि पुग्ने गरेर विद्यालयलाई प्याड वितरण गरेका छौं । विद्यालयमै प्याडको व्यवस्था गरिदिएपछि छात्राहरु नियमित आउने विश्वास छ ।’

विद्यालयका शिक्षिकाहरुलाई प्याड व्यवस्थापनको जिम्मा दिइएको र प्याड कति प्रयोग भयो भन्ने रेकर्ड पनि उनीहरुले राख्ने तिवारीको भनाई छ । ३ लाख २५ हजार खर्चिएर ५ हजार प्याकेट प्याड विद्यालयहरुमा वितरण गरिएको छ । उनले भने, ‘महिनावारी भएको समयमा छात्राहरुको पढाइ अवरोध नहोस् भन्ने गाउँपालिकाको उद्देश्य हो । चेतनाको अभावले किशोरीले पुराना फोहोर कपडा प्रयोग गर्दा संक्रमण फैलने सम्भावना हुन्छ ।’

विद्यालयमा नै सेनेटरी प्याड उपलब्ध भएपछि छात्रालाई सहज भएको म्याग्दे गाउँपालिका १ गुणादीस्थित महेन्द्र माध्यमिक विद्यालयका प्रधानाध्यापक सोमबहादुर थापाले बताए । उनका अनुसार रजस्वलाको समयमा विद्यालय नआउने छात्राको दरमा कमी आउने विश्वास गरिएको छ । उनले भने, ‘रजस्वलाको समयमा छात्राहरु विद्यालय नआउने दर बढ्दै गइरहेको थियो, विद्यालयमै प्याड उपलब्ध हुने भएपछि छात्राहरु नियमित आउने गरेका छन् ।’

तपाईको प्रतिक्रिया