समाधान

जथाभावी उडान भएर लगातार दुर्घटना भएपछि नेपाल नागरिक उड्डयन प्राधिकरण (क्यान) ले प्याराग्लाइडिङ नियमनको जिम्मेवारी नेपाल हवाई खेलकुद संस्था (ना) लाई सुम्पेको छ ।

प्राधिकरणका उपमहानिर्देशक राजन पोखरेलले नाका कार्यवाहक अध्यक्ष कृष्ण भण्डारीलाई प्राधिकारिक संस्था तोकेको प्रमाणपत्र बुधबार हस्तान्तरण गरे । नेपाल नागरिक उड्डयन प्राधिकरण, मनोरञ्जनात्मक उड्डयन नियमावली २०६९ को नियम २३ क तथा मनोरञ्जनात्मक उड्डयन प्राधिकारिक संस्था सम्बन्धी निर्देशिका २०१८ को व्यवस्था बमोजिम प्राधिकरणले नियमन गर्ने गरी व्यवस्थापन तथा प्रवद्र्धन सम्बन्धी कार्यका लागि प्राधिकारिक संस्था नालाई तोकेको हो ।

अब नालाई प्याराग्लाइडिङ र ह्यान्डग्लाइडिङको लाइसेन्स जारी गर्ने, नियम विपरीत चलेको कम्पनी र पाइलटको दर्ता खारेज गर्ने अधिकार हुनेछ । सोलो (एकल) उडान अनुमति सिफारिस गर्ने, सुरक्षित उडान व्यवस्थापन गर्ने, नियम विपरीत कार्य गर्नेलाई कारबाही गर्ने जिम्मेवारी नालाई हुने क्यानका प्रबन्धक देवेन्द्रप्रसाद पाण्डेले बताए । आर्थिक र प्राविधिक लगायत सहयोग भने नालाई क्यानले गर्नेछ ।

नाकै कामको अनुगमन भने क्यानको पोखरा कार्यालयले गर्नेछ । नाले समेत जिम्मेवारी राम्ररी पूरा नगेर उसलाई दिइएको प्राधिकार फिर्ता हुनेछ ।