समाधान संवाददाता
दुलेगौंडा

शुक्लागण्डकीका विभिन्न क्षेत्रमा इलाका प्रहरी कार्यालयबाट खटिएका प्रहरीले गाँजा नष्ट गरेको छ । बुधबार प्रहरी निरीक्षक सरोज गिरीको नेतृत्वमा गएको टोलीले वडा नंं. २ को गाछेपानी र १० को लामिटारमा गाजा नष्ट गरेको होे ।

करिब ५ सय बोट गाँजा नष्ट गरिएको प्रहरी निरीक्षक गिरीले बताए । स्थानीय र प्रहरीको साझेदारीमा कार्यक्रम गरिएको हो । गाँजा लागुऔषध भएकाले गाँजा खेती, उत्पादन, खरिद बिक्री तथा ओसारपसार गर्नेलाई लागुऔषध नियन्त्रण ऐन अनुसार कारबाही हुने उनले बताए । उनले गाँजा नष्ट गर्ने अभियान टोलटोलबाट सुरुआत गर्न सहभागीलाई आग्रह गरे ।

अभियानमा सहभागी वडा नं. ८ का अध्यक्ष कृष्णप्रसाद रेग्मीले मदिरा तथा लागुऔषधले समाजमा नकरात्मक असर पर्ने भएकाले नियन्त्रण गर्नुपर्नेमा जोड दिए । ‘प्रहरीले चालेका यस्ता अभियानलाई हामीले सधैं साथ दिन्छौं’ उनले भने, ‘वडा र नगरका सबै क्षेत्रमा अब अभियान सञ्चालन गर्नु जरुरी छ ।’