बन्दीपुर केबलकार निर्माणका लागि आवश्यक पर्ने जग्गा प्रयाेग गरे बापत जग्गाधनी सेयर

समाधान संवाददाता २०७६ साउन ५ गते १३:१९

कृष्ण न्यौपाने
दमौली

बन्दीपुर केबलकार कम्पनीले केबलकारको पूर्वाधार निर्माणका लागि आवश्यक पर्ने जग्गा प्रयोग गरेबापत जग्गाधनीलाई सेयर दिएको छ । तनहुँको बन्दीपुर गाउँपालिका ४ ठूल्ढुंगादेखि वनको फेदीसम्मको जग्गा प्रयोग गरेबापत कम्पनीले स्थानीयलाई सेयर दिएको हो ।

केबलकारको पूर्वाधार निर्माणका लागि आवश्यक पर्ने ५ रोपनी जग्गा प्रयोग गरेबापत जग्गाधनीलाई ४५ लाख बराबरको सेयर प्रदान गरिएको केबलकारको साझेदारी कम्पनी आरकेडी रियल स्टेट एन्ड कन्स्ट्रक्सन लिमिटेडका अध्यक्ष रामचन्द्र शर्माले जानकारी दिए ।

११ जना स्थानीयलाई सेयरबापतको प्रबद्र्धक सेयर लगानी प्रमाणपत्र हस्तान्तरण गरिएको छ ।

बढी सेयर पाउनेले २ लाख ५६ हजारसम्म पाएका छन् । पोल परेको जग्गालाई प्रतिआना १ लाख र तारमात्रै परेको जग्गालाई प्रतिआना ५० हजारका दरले मूल्यांकन गरी सेयरमा रुपान्तरण गरिएको शर्माले बताए । १ जनालाई १ लाख ४५ हजार नगद नै हस्तान्तरण गरिएको छ ।

केबलकार कम्पनीमा २ सय २५ जना स्थानीयले सेयर हालिसकेका छन् । स्थानीयबाट केबलकार निर्माणका लागि करिब ३ करोड संकलन भएको छ । केबलकारमा बन्दीपुर गाउँपालिकाले ५० लाख सेयर हालेको छ । ‘स्थानीयका लागि १३ करोड सेयर छुट्याएका थियौं, अहिलेसम्म रु ३ करोड सेयर संकलन भएको छ,’ शर्माले भने ।

अहिले केबलकारको पूर्वाधार निर्माण भइरहेको छ । केही दिनअघि मात्रै निर्माण सुरु भएको केबलकारको बटम स्टेसन भवन बन्दै छ । आरकेडी रियल स्टेट एन्ड कन्स्ट्रक्सन लिमिटेड, पञ्चासे केबलकार एन्ड टुर्स लिमिटेड, टुरिजम इन्भेस्टमेन्ट फन्ड, बन्दीपुर गाउँपालिका र स्थानीयवासीको साझेदारीमा निर्माण हुन लागेको बन्दीपुर पर्यटन पूर्वाधारयुक्त परियोजनाको लागत १ अर्ब ३८ करोड छ ।

केबलकारको टप स्टेसनमा १० तलाको होटलसहितको भवन निर्माण गरिनेछ । ८२ करोडमा निर्माण हुने उक्त भवनमा आधुनिक भ्यु टावर, बेनक्युट हल र ८० कोठाको हुनेछ । । शर्माका अनुसार रेस्ट्रो जोन, सपिङ मल र केबलकारको ड्राइभ स्टेसन, टिकट काउन्टर र उत्तर दक्षिण प्यासेजको निर्माण गर्ने गरी काम अगाडि बढाइएको छ । ५ सय क्षमताको सभाहल पनि भवनमा बनाइनेछ ।

प्रारम्भमा ५६ करोडमा केबलकार बनाउने योजना रहेकोमा कम्पनीले केबलकार प्रविधिलाई आधुनिक ‘मोनोकेबल डिटाचेबल प्यासेन्जर सिस्टम’ जडान गर्ने र सुरक्षाको पक्षलाई महत्व दिएर सुरक्षा उपकरण जडान गर्ने योजना थप गरेपछि लागत वृद्धि भएको छ । साहसिक पर्यटनको मज्जा दिन बन्दीपुरदेखि छिम्केश्वरी फेदीसम्म माउन्टेन जंगल सफारीको सेवा सुरु गर्ने गरी कम्पनीले लगानी गर्ने जनाएको छ । ‘परियोजनामा सबै क्षेत्रको लगानी सुनिश्चित गर्नका लागि निजी, सामुदायिक, सहकारी, सरकारी र संस्थागत साझेदारी एवं व्यवस्थापनको मोडेलमा पुँजी निर्माण गरिनेछ,’ उनले भने ।

ठूल्ढुंगास्वाँराबाट बरालथोकसम्म जोडिने केबलकारबाट घण्टामा २ सय जना वारपार गर्न सक्नेछन् । एसियाकै ठूलो दाबी गरिएको विमलनगरस्थित सिद्धगुफा र प्राकृतिक दृश्यावलोकनका लागि उपयुक्त बन्दीपुर घुम्न आउने पर्यटकका लागि आकर्षणको केन्द्रविन्दु बन्ने विश्वास लिइएको छ । ठूल्ढुङ्गास्वाँराबाट सुरू हुने केबलकार सिद्धगुफाको छेउ हुँदै बन्दीपुरको उचाइसम्म पुग्नेछ । केबलकारले १ किलोमिटर ६ सय मिटर यात्रा गर्नेछ । तनहुँको डुम्रे बजारदेखि बन्दीपुर पुग्न ७ किलोमिटरको उकालो दूरी बसमा करिब २० मिनेट लाग्छ । केबलकार निर्माण भएपछि केबलकारमा ९ मिनेटमा बन्दीपुर पुग्न सकिनेछ । केबलकारमा २ वटा सामान बोक्नेसहित १७ वटा बाक्सा रहनेछन् ।

तपाईको प्रतिक्रिया