टुर दी पोखराको सप्ताहव्यापी कार्यक्रम

समाधान संवाददाता २०७६ पुष १० गते १२:५९

समाधान संवाददाता
पोखरा

टुर दी पोखराको सप्ताहव्यापी अभियान अन्तर्गत पोखरामा बुधबार कार्यक्रममा ५० युनिट रगत संकलन भएको छ । न्युरोडस्थित साइकल ल्यान्ड परिसरमा भएको कार्यक्रम पोखरा महानगरपालिका ८ का वडाध्यक्ष रुद्रनाथ बरालले रक्तदातालाई ब्लडब्याग हस्तान्तण गरी उद्घाटन गरे । ‘थोपा थोपा इन्धन बचाऔं’ नाराका साथ पुस १२ गते हुने ५ औं संस्करणको टुर दी पोखराको प्रचारस्वरुप रक्तदान गरिएको जीतेन्द्रमान शाक्यले बताए ।

वडाध्यक्ष बरालले आफूहरुले पोखरामा साइकल लेनको आवश्यकता महसुस गरेको बताए । महानगरको आगामी योजनामा साइकल लेनलाई समेट्ने प्रतिबद्धता उनले जनाए । टुर दी पोखराका संयोजक राजन गोंगजुले साइकलका माध्यमले पर्यटक बढाउनुका साथै वातावरण प्रदूषणसमेत रोकिने भएकाले यसमा सहभागी हुन आग्रह गरे । संस्थाका अध्यक्ष महेन्द्रराज कोइरालाको सभापतित्वमा भएको कार्यक्रममा क्षेत्रीय रक्त सञ्चार केन्द्र पाखराले प्राविधिक सहयोग गरेको सचिव करुणा ढकालले बताइन् ।

पोखराको पर्यटनलाई प्रवद्र्धन गर्दै वातावरण प्रदूषण कम गराउने र इन्धनको प्रयोग घटाउने सन्देश प्रवाह गर्न ५ वर्षदेखि टुर दी पोखरा हुँदै आएको छ । अघिल्ला संस्करणभन्दा यसपालि केही परिमार्जन गरेर रक्तदान र जिल्लास्तरीय खुला साइकल दौड पनि जोडिएको छ । पुस ९ गते बिहान न्युरोडस्थित साइकल ल्यान्ड परिसरमा रक्तदान र पुस ११ गते १८.५ किलोमिटर दुरीको साइकल दौड हुने गोंगजुले जानकारी गराए ।

पुस १२ गते मुल कार्यक्रम अन्तर्गत पोखरा प्रदर्शनी केन्द्रबाट साइक्लिङ सुरु हुनेछ । त्यसअघि स्लो साइकल रेस, बाल ह्विल रेस र जिगज्याग साइक्लिङ हुनेछ । टुर दी पोखराका लागि दर्ता खुलेको र ज्याकेटसहित खानाका लागि ८ सय रुपैयाँ दर्ता शुल्क तोकिएको छ । ज्याकेटमात्र लिए ६ सय र खानामात्रको ३ सय रुपैयाँमा दर्ता गर्न सकिने छ । आइएमई पेमार्फत् पनि यो कार्यक्रमका लागि नाम दर्ता गर्न सकिने आइतबार पोखरामा आयोजित पत्रकार सम्मेलनमा आयोजकले जानकारी गराए । पुस १२ गतेकै लागि काहुँडाँडामा साइक्लिङसहित १ रातको बसाइ राखिएको पोखरा साइकल सिटीका निवर्तमान अध्यक्ष प्रकाश बज्राचार्यले जानकारी दिए । टुर दी पोखरामा सहभागी हुने सबैलाई मेडल र प्रमाणपत्रको व्यवस्था छ ।

भ्रमण वर्षको पूर्वसन्ध्यामा हुने यो कार्यक्रमले स्वदेशी र विदेशी पर्यटकलाई समेत आकर्षण गर्न सहयोग गर्ने आयोजकको दाबी छ । अघिल्लो वर्षबाट नेपाल आयल निगमको सहकार्यमा यो कार्यक्रम हुँदै आएको छ । नेपालमा बर्सेनि २ खर्बको पेट्रोलियम पदार्थ खपत हुने भएकाले यसलाई विस्तारै कम गराउनका लागि निमगले साइकल सिटीसँग सहकार्य गरेको निगमको गण्डकी कार्यालय प्रमुख बिनी श्रेष्ठले बताइन् ।

शारीरिक अपांगता भएका विद्यार्थी विशाल गर्बुजा यसपालिको टुर दी पोखराका लागि सद्भावनादूत नियुक्त भएका छन् । १ हात नभएका गर्बुजा कास्की मोडर्नाइज्ड स्कुलमा १२ कक्षाका विद्यार्थी हुन् । १ हात नभए पनि अरु सामान्य मानिसले भन्दा सहज रुपमा साइकल चलाउने उनी काठमाडौंमा भएको ‘कोरा’ मा समेत सहभागी भइसकेका छन् ।

तपाईको प्रतिक्रिया