खोरमा परेर पाेथी चितुवा नियन्त्रणमा

समाधान संवाददाता २०७६ पुष ११ गते १३:३४

कृष्ण न्यौपाने
दमौली

तनहुँको व्यास नगरपालिका ९ बिर्तास्थित सामुदायिक वनमा थापिएको खोरमा परेर बिहीबार १ चितुवा नियन्त्रणमा आएको छ । चितुवा नियन्त्रणका लागि स्याकुनथोक सामुदायिक वनमा राखिएको फलामको खोरमा परेर पोथी चितुवा नियन्त्रणमा आएको हो ।

पोथी चितुवा ६÷७ वर्षको र ३०÷३५ किलो तौल रहेको डिभिजन वन कार्यालय तनहुँका प्रमुख केदार बरालले जानकारी दिए । बरालका अनुसार नियन्त्रणमा आएको चितुवालाई सुरक्षित स्थानान्तरण गरिएको छ ।

उक्त वडामा चितुवाले बाख्रा मारेको र मान्छेको बाटो छेकेको जनगुनासो आएपछि कार्यालयले फलामको खोर थापेको थियो । हालसम्म परम्परागत काठे खोरमा भानु नगरपालिका क्षेत्रमा मात्र चितुवा खोरमा परेकोमा यस पटक फरक स्थान र पहिलो पटक फलामे खोरमा चितुवा पर्न सफल भएको बरालले जानकारी दिए ।

भानु नगरपालिकामा सबैभन्दा बढी चितुवा आतंक छ । भानु नगरपालिकामा चितुवाको आक्रमणबाट डेढ वर्षको अवधिमा ६ जना बालबालिकाको मृत्यु भइसकेको छ । भानु नगरपालिकासँग सीमाना जोडिएको व्यास नगरपालिका ९ मा पछिल्लो समय चितुवाको आतंक बढ्न थालेको स्थानीयबासी बताउँछन् । भानु नगरपालिका १, २, ३ र ४ का विभिन्न सामुदायिक वनमा पनि चितुवा नियन्त्रणका लागि काठको खोर निर्माण गरेर राखिएको छ । भानुका सामुदायिक वनमा काठको खोरमा परेर हालसम्म ५ वटा चितुवा नियन्त्रणमा आइसकेको छ । त्यस्तै केही समय अघि व्यास नगरपालिका १ मुसेखोला र व्यास नगरपालिका ७ कलेस्तीमा चितुवा मृत अवस्थामा फेला परेको थियो ।

तपाईको प्रतिक्रिया