समाधान संवाददाता

रुपा गाउँपालिकाका अध्यक्ष नवराज ओझाले गाउँपालिकामा कोरोनाका २ संक्रमित भेटिएपनि त्रसित नहुन आग्रह गरेका छन् । क्वोन्टिनमा बसेका बाँकी व्यक्तिहरुको अवस्था सामान्य रहेको र विश्व स्वास्थ्य संगठनको मापदण्ड अनुसार नै क्वारेन्टिन निर्माण गरेकाले उच्च सावधानी अपनाइएकोले त्रसित नभई सचेत रहन उनकाे आग्रह छ ।

गण्डकी प्रदेश स्वास्थ्य निर्देशनालयले शनिबार रुपाका २ पुरुषलाई कोरोना भाइरस संक्रमण पुष्टि गरेको थियो । संक्रमित भारतबाट आएका थिए । सीमा नाकाबाट सुरक्षित तवरले गाउँपालिका ७ स्थित हंसपुर क्वारेन्टिनमा राखिएको अध्यक्ष ओझाले जारी विज्ञप्तीमार्फत बताएका छन् ।

क्वारेन्टिनमा भएका २४ जनामध्य भारतको हैदराबादबाट आएका रुपा ५ का २३ वर्षीय र ७ का ३२ वर्षीय दुबै पुरुषको संक्रमण देखिएको तर बाँकी २२ जनाको रिपोर्ट नेगेटिभ देखिएको जारी विज्ञप्तीमा उल्लेख छ ।

संक्रमितको उपचारका लागि पश्चिमाञ्चाल क्षेत्रीय अस्पतालको आइसोलेसन कक्षमा पठाइसकिएको अध्यक्ष ओझाले जानकारी दिए ।

अस्पतालका निर्देशक डा अर्जुन आचार्यले समेत विज्ञप्ती जारी गर्दै रुपाका २ र पोखराका १ संक्रमितको उपचारका लागि आइसोलेसन वार्डमा भर्ना गरिसकिएको जनाएका छन् । संक्रमित सबैको स्वास्थ्य सामान्य रहेको अस्पतालले जनाएको छ ।