कास्कीमा जोर बिजोर प्रणालीः आज सम्झाइ बुझाइ, भाेलिदेखि कारवाही

समाधान संवाददाता २०७७ जेठ ३० गते १२:४६

समाधान संवाददाता

सरकारले लकडाउनलाई खुकुलो बनाउने निर्णय गरेसँगै निजी सवारी साधन सञ्चालनको मादपण्ड सार्वजनिक गरेको छ । सरकारका प्रवक्ता डा युवरात खतिवडाले सार्वजनिक गरेको निर्णयअनुसार आजदेखि मुलुकभरका निजी सवारी साधन जोर बिजोर प्रणालीमा सञ्चालनमा आएका छन् ।

जोर गते जोर नम्बरका सवारी र बिजोर गते बिजोर नम्बरका सवारी सञ्चालन निगरानी गर्न मातहतका ट्राफिक कार्यालयलाई निर्देशन छ ।

कास्कीमा आज(शुक्रबार) जोर बिजोर लागु भएको छैन । जिल्ला ट्राफिक प्रहरी कार्यालय कास्कीका प्रहरी नायब निरीक्षक पूर्णबहादुर अधिकारीले एकैपटक निर्णय कार्यान्वयन गराउँदा सर्वसाधारणलाई मर्का पर्ने भएकाले शुक्रबार सम्झाइ बुझाइ गर्ने बताए ।

‘निर्णय लागु गराउने तयारी गरिरहेका छौं,’ उनले भने, ‘शुक्रबार सम्झाइ बुझाइ गर्छौ । शनिबारदेखि कार्यान्वयनमा जान्छौं ।’

सरकारले जारी गरेको मापदण्ड कार्यान्वयनबारे पहिले सूचित गरिने र कार्यान्वयनको चरणमा जाने उनले बताए ।

कोरोना भाइरसका कारण सतर्कता स्वरुप लकडाउनलाई पूर्ण नखुलाइसकेको अवस्थामा सडकमा सवारी चाप कम गर्न सरकारले विभिन्न मापदण्ड बनाएको छ ।

२ पाङ्ग्रे सवारी मोटरसाइकल तथा स्कुटरमा चालक मात्र सवार हुन पाउने सरकारका प्रवक्ता डा खतिवडाले बताएका थिए ।

तर उक्त निर्णयलाई लिएर विभिन्न टिकाटिप्पणी भइरहेका छन् । सवारी पास लिएकाको हकमा भने जोर बिजोर लागु नहुने भएको छ ।

फाइल तस्बिर समाधान

तपाईको प्रतिक्रिया