समाधान संवाददाता, पोखरा

बलात्कार आरोपमा बुधबार पोखराबाट पक्राउ परेका शसस्त्र प्रहरीका एसएसपी राजेन्द्रकुमार अधिकारी हिजो (मंगलबार) सरुवा भएका थिए ।

उनलाई सशस्त्र प्रहरी बल नेपाल हुल तथा दंगा व्यवस्थापन तालिम शिक्षालय लामापाटन पोखराबाट सरुवा गरी प्रधान कार्यालय कार्य तथा सीमा सुरक्षा विभाग तानिएको छ ।

मंगलबार मात्र सशस्त्र प्रहरी बल नेपाल प्रधान कार्यालयले उनी सहित १७ एसएसपीको सरुवा सूची सार्वजनिक गरेको थियो । उनको ठाउँमा एसएसपी विदुर खड्कालाई जिम्मेवारी तोकिएको छ । खड्का प्रधान कार्यालय मातहतको मानव श्रोत कार्यरत थिए ।

एसएसपी अधिकारी सहितको सरुवाको सूची सार्वजनिक भइसकेर पोखरा छाड्ने तयारीमै थिए । सशस्त्र प्रहरी बल प्रधान कार्यालयले जारी गरेको सूचना मुताबिक उनलाई साउन १ गते अर्थात् भोलि (बिहीबार) खटाइएको ठाउँमा हाजिर हुन निर्देशन थियो ।

तर एसएसपी अधिकारीले पोखरा छाड्दै गर्दा उनको कर्तुत बाहिरिएको छ । उनी विरुद्ध बलात्कारको आरोप लागेको छ । उनलाई बुधबार दिउँसो कास्की प्रहरीले लामापाटनस्थित उनकै कार्यालय परिसरबाट पक्राउ गरेको हो ।

चितवनकी २७ वर्षीया १ महिलाले अधिकारी विरुद्ध बलात्कारको आरोपमा जिल्ला प्रहरी कार्यालय कास्कीको कन्ट्रोल रुममा मौखिक उजुरी दिएकी थिइन् ।

तत्कालै प्रहरीले एसएसपी अधिकारीलाई पक्राउ गरेको थियो । उनलाई पोखरा १४ स्थित शिक्षालयबाटै पक्राउ गरिएको कास्की प्रहरी प्रमुख तथा एसपी जीवनकुमार श्रेष्ठले जानकारी दिए ।

ती युवतीलाई एसएसपी अधिकारीले खाना खाने निम्तो दिएर लामापाटनस्थित आफ्नो क्वाटरमा बोलाएका थिए । खानपिन गर्ने क्रममा आफूलाई लठ्याउने औषधी खुलाएर जबरजस्ती करणी गरेको प्रहरीसँगको प्रारम्भिक बयानका क्रममा युवतीले बताएकी छन् ।

एसएसपी अधिकारीलाई पक्राउ गर्न जिल्ला प्रहरी कार्यालय कास्कीका प्रमुख एसपी जीवनकुमार श्रेष्ठ आफैं गएका थिए । सशस्त्र प्रहरीका प्रदेश डिआइजी कविन्द्रमान श्रेष्ठ समेत घटनास्थलमा पुगेर फर्किएका छन् ।

सम्बन्धित खबरहरु

पक्राउबाट जोगिन झाडीमा लुकेका थिए राजेन्द्र अधिकारी

एसएसपीको बलात्कार काण्ड–युवती चितवनकी, खाना खाने निम्तो, दिउसै बलात्कार

सशस्त्रका एसएसपी राजेन्द्र अधिकारी बलात्कार आराेपमा पक्राउ