स्याङ्जा

गल्याङ नगरपालिकामा कोरोना संक्रमणको जोखिमबारे स्थानीयलाई सचेत गराउँदै बजार अनुगमन गरिएको छ । नगरपालिकाले तोकेको मापदण्ड अनुसार मात्र बजार सञ्चालन गर्न, सामाजिक दुरी कायम राख्न र मास्कको अनिवार्य प्रयोग गर्न सचेत गराइएको हो ।

गल्याङ नगरपालिकाका प्रमुख प्रशासकीय अधिकृत ईश्वरीप्रसाद पाण्डेको नेतृत्वमा गरिएको अनुगमनमा प्रहरी, गल्याङ उद्योग वाणिज्य संघ तथा गल्याङ चेम्बर अफ कमर्सका पदाधीकारीको सहभागिता थियो ।

अनुगमनका क्रममा तोकिएको समयमा मात्र अत्यावश्यक पसल तथा व्यवसाय मात्रै सञ्चालन गर्न, कपडा तथा भाँडा पसलहरु सञ्चालन नगर्न अनुरोध गरिएको थियो । दूध, तरकारी र फलफूल पसल विहान ७ बजे देखि ८ बजेसम्म मात्रै, खाद्यान्न पसल मध्याह्न १२ बजे देखि ३ बजेसम्म मात्रै सञ्चालन गर्न अनुरोध गरिएको हो ।

अन्य पसल व्यवसाय सञ्चालन नगरी कोरोना भाइरस विरुद्वको लडाइँमा सहकार्य गर्न नगरपालिकाले अनुरोध गरेको छ । अनुगमनका क्रममा मास्क नलगाई हिँड्नेहरुलाई अबका दिनमा माक्स लगाएर हिँड्न आग्रह गर्दै मास्क वितरण गरिएको थियो ।

अनुगमनमा प्रमुख प्रशासकीय अधिकृत पाण्डेले स्थानीयको सुरक्षाका लागि आफूहरु नै सचेत हुनुपर्ने भन्दै उनले अरुले भनेर भन्दा पनि आफ्नो सुरक्षा आफै गर्नुपर्ने बताए । यहाँ बैंकहरुलाई अत्यावश्यक काम बाहेक अरु काम नगर्न अनुरोध गरिएको छ । सहकारीहरु पूर्ण रुपमा बन्द गरिएको छ ।