मापदण्ड मिचेर फिल्म सुटिङ

समाधान संवाददाता २०७८ वैशाख २० गते ७:४६

मुस्ताङमा अहिले भारतीय चलचित्र तिरिमाली छायांकन भइरहेको छ

सुन्दरकुमार थकाली, जोमसोम

समुदाय स्तरमा कोरोनाको दोस्रो लहर फैलिन थालेपछि मुस्ताङी कोरोनाको त्रास बढेको छ । कोरोनाकै कारण बिहीबार १ महिलाले ज्यान गुमाइन् भने जिल्लामा अझै १२ सक्रिय संक्रमित छन् ।

केही साताअघिसम्म ग्रिन जोन रहेको मुस्ताङमा पर्यटकीय गतिविधि बढेसँगै संक्रमणको ग्राफ बढेको हो । चैते ददैं, औंसी, नयाँ वर्ष र रामनवमी लगायतका पर्वमा सयौं धार्मिक पर्यटक मुस्ताङ आएका थिए ।

भारतसँगै नेपालमा पनि कोरोनाको दोस्रो लहर फैलिएपछि मुस्ताङको सिसिएमसीको आकस्मिक बैठकले ११ वैशाखदेखि मुक्तिनाथ मन्दिर बन्द ग¥यो ।

बैठकले विवाह, ब्रतबन्ध, भोज भतेर, सभा, समारोहमा भीड कम गर्ने निर्णय भयो । बैठकले धार्मिक मठ, मन्दिर, गुम्बा र चर्चमा नियमित पूजापाठबाहेक सबै गतिविधिमा रोक लगायो ।

यस्ता कार्यक्रममा १५ जनाभन्दा बढी भेला हुन नपाइने र जिल्ला प्रवेश गर्ने पर्यटकलाई होटल क्वारेन्टाइन बसेको प्रमाणपत्र अनिवार्य गरियो । सिसिएमसीले आन्तरिक तथा बाह्य पर्यटकलाई सकभर जिल्ला प्रवेश नगर्नसमेत अनुरोध ग¥यो ।

संक्रमणको उच्च जोखिमलाई चुनौती दिदै १६ वैशाखमा भारतीय जम्बो चलचित्र छायांकन टोली मुस्ताङ आइपुग्यो । भारतमा कोरोनाको जोखिम उत्कर्षमा पुगेका बेला भारतीय चलचित्रकर्मी मुस्ताङ आएपछि स्थानीय त्रस्त छन् ।

सूचना तथा सञ्चार मन्त्रालयको अनुमति लिएर मुस्ताङमा छायांकन गर्न आएको टोलीले जनाएको छ । टोलीमा ५०÷६० जना छन् । जसमा ४÷५ जना नेपाली कलाकार पनि छन् ।

जिल्ला प्रशासन कार्यालय मुस्ताङले जम्बो भारतीय चलचित्रकर्मीको टोलीले सञ्चार मन्त्रालयको अनुमति लिएको र चलचित्र छायांकनलाई सरकारले रोक लगाइ नसकेकाले जिल्ला प्रवेशको अनुमति दिएको जनाएको छ ।

मुस्ताङका सहायक प्रमुख जिल्ला अधिकारी जगदीश अर्यालले भारतीय टोलीलाई बस्तीभन्दा पर छायांकन गर्न सुझाइएको सुनाए ।

टोलीले मुस्ताङको मुक्तिनाथ, कागबेनी, छुसाङ, जोमसोम, स्याङ, मार्फा, टुकुचे, ढुम्बाताल, नाउरिकोट लगायतका गाउँमा सुटिङ गर्ने जनाए पनि कोरोना जोमिखका कारण स्थानीयले सुटिङ गर्न दिएनन् । स्थानीय प्रशासनले बस्तीदेखि टाढा भने पनि उनीहरु बस्तीनजिक नै सुटिङ गर्न चाहन्थे ।

गाउँलेको अवरोधपछि निर्धक्क सुटिङ गर्न नसकेको टोलीका सदस्यहरु बताउँछन् । मुस्ताङको घरपझोङ ३ पुथाङ एअरपार्टका २ होटलमा बसेका उनीहरुले सुटिङका लागि १ बस र ५ वटा जिप भाडामा लिएका छन् ।

आफूहरु पिसिआर रिपोर्टसमेत लिएर आएको बताउने उनीहरुले सुटिङस्थलमा आवश्यक सुरक्षा मापदण्डसमेत पालना नगरेको स्थानीय बताउँछन् ।

मुस्ताङमा अहिले भारतीय चलचित्र तिरीमाली छायांकन भइरहेको छ ।नेपाली र भारतीय निर्माता रहेको उक्त चलचित्र युनिटले १५ वैशाखदेखि लगातार मुस्ताङका विभिन्न स्थानमा छायांकन गरिरहेको छ ।

यो भारतीय चलचित्र केरला भाषामाको हो । यसमा भारतीय निर्माता एसके लोरेन्स र नेपाली निर्माता सरोज न्यौपानेको संयुक्त लगानी छ । चलचित्रमा नेपाली कलाकारहरु स्वस्तिमा खड्का, माओत्से गुरुङ र उमेश तामाङ पनि छन् ।

जिल्ला प्रशासन कार्यालय मुस्ताङले १५ जनाभन्दा बढी भेला हुन नपाउने जनाए पनि फिल्म छायांकनले प्रशासनको धज्जी उडाएको स्थानीयको भनाइ छ । छायाँकन अझै ३ दिन चल्ने जनाइएको छ ।

तपाईको प्रतिक्रिया