पोखरा ।
ब्रेकिङ बाउन्ड्रिज एमसिसी अन्तर विद्यालय छात्र छात्रा क्रिकेट प्रतियोगिता अन्तर्गत छात्रतर्फ अमरसिंह तथा छात्रातर्फ भद्रकाली मावि विजयी भएका छन् । पोखरा क्रिकेट एकेडमीको आयोजना तथा मेरोलिवोन क्रिकेट क्लब फाउन्डेसन युके र किडासा युकेको प्राविधिक सहयोगमा भएको प्रतियोगिताको फाइनलमा छात्रतर्फ अमरसिंहले बाराही माविलाई ७६ रनको फराकिलो अन्तरले पराजित गरेको हो ।

पहिला ब्याटिङ गरेको अ्मरसिंहले पूरा २० ओभरमा ८ विकेट गुमाएर १ सय २२ रनको योगफल तयार पारेको थियो । अमरसिंहका सुमन पन्तले २९ रन जोडे । भद्रकालीका बलर अशोक रेग्मीले ४ तथा मनोज कार्कीले ३ विकेट लिए । जितका लागि १ सय २३ रनको लक्ष्य पछ्याएको बाराहीले ४६ रनमै सम्पूर्ण विकेट गुमाएको थियो । अमरसिंहका सुदीप भट्टराईले ५ विकेट लिए ।

छात्रातर्फ भद्रकालीले कालिकालाई २ विकेटले पराजित गर्दै उपाधि जितेको हो । पहिला ब्याटिङ गरेको कालिकाले ३५ रन बनाएको थियो । ३६ रनको चुनौती पछ्याएको भद्रकालीले ८ ओभरमा ९ विकेट गुमाउँदै विजयी लक्ष्य प्राप्त ग¥यो । भद्रकालीका श्रद्धा गुरुङले ६ विकेट लिइन् । प्रतियोगितामा छात्रतर्फ अमरसिंहका सुदीप भट्टराई सर्वोत्कृष्ट खेलाडी बन्दा बाराहीका अशोक रेग्मी उत्कृष्ट बलर र बाराहीकै मनोज कार्की उत्कृष्ट ब्याट्स्म्यान भए । छात्रातर्फ अमरसिंहकी सजना खत्री सर्वोत्कृष्ट खेलाडी, श्रीकृष्ण माविका मंजली थापा उत्कृष्ट बलर तथा कालिकाकी रिया गुरुङ बेस्ट ब्याट्सउमन बनिन् ।

विजयी खेलाडीलाई गण्डकी प्रदेश खेलकुद परिषद्का सदस्य सचिव तेज गुरुङ, किडासाका सिइओ जेनिस मिलर, आयोजक समिति अध्यक्ष बबिन कुँवर, कास्की जिल्ला क्रिकेट संघका कोषाध्यक्ष वीरेन पुन लगायतले पुरस्कार, ट्रफी, मेडल र प्रमाणपत्र वितरण गरेका थिए ।