पोखरा ।
बागलुङको गलकोट बहुमुखी क्याम्पसको स्ववियु सभापतिमा नेपाल विद्यार्थी संघका लोकेन्द्र गैरे सर्वसम्मत बनेका छन् ।

क्याम्पसमा क्रियाशील सबै विद्यार्थी संगठनको सहमतिमा उनी चुनिएका हुन् । स्ववियुका सबै पदमा सर्वसम्मत भएको छ ।

उपाध्यक्षमा नेविसंघकै सुप्रिया गौतम, सचिवमा अखिल क्रान्तिकारीका गगन विश्वकर्मा, सहसचिवमा अनेरास्ववियुकी सुस्मा पन्त र कोषाध्यक्षमा अनेरास्ववियु (छैठौँ) का गणेश सापकोटा छन् ।

सदस्यमा नेविसंघकी हिरादेवी सुवेदी, विशाल उप्रेती, अनेरास्ववियुका निशा थापा, अखिल क्रान्तिकारीका सारा पुन, हेमन्त भण्डारी र अनेरास्ववियु (छैठौँ)की विनिता गौतम छन् ।

मनोनयन दर्ताका दिन सबै पदमा एकल उम्मेदवारी परेको हो । चैत ५ गते निर्वाचनको मिति तय थियो । यहाँ ०७३ सको स्ववियु निर्वाचनमा नेपाल विद्यार्थी संघ र अखिल क्रान्तिकारीबीच प्रतिस्पर्धा भएको थियो । त्यो वेला नेविसंघका गुमानसिंह भण्डारी चुनिएका थिए ।