म्याग्दी ।
बेनी नगरपालिका ७ मा पर्ने कुरीलाखर्कको ओडारमा बस्दै आएका राहुल विकलाई बुधबार उद्धार गरिएको छ । बेनी अर्थुंगे सडकको छेउमा रहेको ओडारमा बस्ने बेनी नगरपालिका ५ भीरमुनिका ५० वर्षीय विकको उद्धार गरिएको हो ।

बेनी नगरपालिकाकी उपप्रमुख ज्योति लामिछानेले विकलाई ओडारबाट उद्धार गरेर मानव सेवा आश्रमको बागलुङ शाखामा लगिएको जानकारी दिइन् । ‘१ वर्षदेखि ओडारमा बस्दै आउनुभएका राहुलको अवस्था नारकीय थियो । धेरै पटकको प्रयासपछि आज आश्रममा जान मान्नुभयो’, उनले भनिन्, ‘घरका सदस्य नभएका र सामाजिक बहिष्करणमा पर्नुभएका उहाँलाई पुनस्र्थापना नहुँदासम्म मानव सेवा आश्रममा राखेर उपचार गर्ने व्यवस्था मिलाएका छौँ ।’

शारीरिक कमजोरीका कारण श्रम गर्न नसक्ने र मागेर ल्याएको खानेकुरा पकाएर खाने गरेका राहुललाई नगर उपप्रमुख लामिछाने र नगर प्रहरीको टोलीले उद्धार गरेको हो । छोराहरूको मृत्यु, श्रीमतीले दोस्रो विवाह गरेको र आफन्तले हेला गरेपछि ओडारमा बस्न बाध्य भएका राहुलबारे २०७९ साल फागुन ८ गते समाचार सार्वजनिक भएको थियो ।

‘शक्ति र उमेर हुँदासम्म ३५ वर्ष भारतमा काम गरें,’ राहुलले भने, ‘उमेर घर्किएपछि गाउँ फर्कंदासाथ दिने कोही भएनन् । हेला गर्न थालेपछि घर छाडेर ओडारमा बस्नु परेको हो ।’ उनले कन्दमूल खोज्ने र मागेर ल्याएको अन्नबाट दैनिकी चलाउने गरेका थिए ।

सो ओडर बेनीबजारदेखि करिब १ किलोमिटर छ । सडकको कान्लामाथिको सानो ओडारमा फाटेका कपडा ओछ्याएर सुत्ने गरेका राहुलको शरीर चिसोले सुन्निएको छ । काम गर्न नसक्ने भएकाले कसैले दिएको तथा मागेर भेटेको आफैँले पकाएर खाने गरेका कुरिलाखर्कका सुरेश ढुंगानाले बताए । ‘मेरो भैँसी फार्मसँगै जोडिएको ओडारमा बस्न थाल्नुभएको डेढ वर्ष जति भयो,’ उनी भन्छन्, ‘काम गर्न सक्दिनँ । मलाई यही ठीक छ भन्दै अन्यत्र जान मान्नुभएको थिएन ।’

राहुल बस्दै आएको ओडारमा दिउँसो घाम लागे पनि राति चिसो हावा र पानीको बाछिटा सिधै छिर्छ । मागेर जुटाएको खाद्यान्न बाँदरबाट जोगाउनै हम्मे पर्ने राहुललाई रातमा चितुवाको डर थियो ।