पोखरा ।

गण्डकी प्रदेश भलिबल टीमका सदस्य सन्तोष बहादुर थापाको मोटरसाइकल दुर्घटनामा निधन भएको छ । मंगलबार राती ११ बजे स्याङजाको वालिङ नगरपालिका केऔरे भञ्ज्याङबाट घर फर्कर्दै गरेको अवस्थामा उनको मोटरसाइकल दुर्घटनामा परेको हो । २२ वर्षिय वालिङ केऔरै भञ्ज्याङबाट वडा स्तरिय भलिबल प्रतियोगितामा सहभागी भएर आफ्नो घर चापाकोट नगरपालिका –२ धुर्कोट फर्किर्दै थिए । सन्तोष चापाकोटको दुर्दाङ भन्ने स्थानमा दुर्घटनामा परेका हुन् ।

भलिबलका ओपन स्पाइकर थापाले गण्डकी प्रदेशको तर्फबाट नवौं राष्ट्रिय खेलकुद प्रतियोगिता, राष्ट्रिय यू–२३ भलिबल छनौट प्रतियोगिता तथा पहिलो, दोश्रो र तेश्रो सस्करणको टाइगर कप भलिबल प्रतियोगितामा सहभागी खेलाडी हुन् । सशस्त्र प्रहरीको एपिएफ क्लबबाट समेत खेलका सन्तोषको निधनमा बिहीबार गण्डकी प्रदेश भित्र हुन् भलिबल प्रतियोगिताहरु स्थगित गरिएको थियो ।

गण्डकी प्रदेश भलिबल संघका अध्यक्ष नविन गुरुङल सन्तोषको सम्मानमा प्रदेश भित्र सञ्चालन भइरहेका सम्पूर्ण भलिबल प्रतियोगिताहरु स्थगित भएको जानकारी दिए । ‘प्रदेशको भलिबलले ठूलो क्षती व्यहोरेको छ । एक उत्कृष्ट यूवा खेलाडी हामीले गुमायौं । सन्तोषले पु¥याएको योगदानको कदर गर्दै प्रदेश भित्र सञ्चालन भइरहेका सम्पूर्ण भलिबल प्रतियोगिताहरु बिहीबार स्थागित भएको छ ।

सन्तोषको निधनमा प्रदेश खेलकुद परिषदका सदस्य सचिव एवं नेपाल भलिबल संघका सचिव श्रीधर शर्माले सन्तोषको असमायिक निधन प्रति गहिरो दुःख व्यक्त गरेका छन् । सन्तोषको नै बिहिबार स्याङजा चापाकोटस्थित कालीगण्डकी घाटमा अन्तिम श्रद्धाञ्जली दिने कार्यक्रम छ । उनको सम्मानमा पार्थीव शरिरमा प्रदेश भलिबल संघको झण्डा ओढाइने छ ।