जोमसोम ।
मुस्ताङको लोघेकर दामोदरकुण्ड गाउँपालिकाको दामोदरकुण्ड पदमार्ग र थासाङको गुरुसाङ्वो गुफा जाने पदमार्ग २ वटा झोलुंगे पुलको बुधबार डिपिआर सर्भे गरिएको छ । सहरी विकास मन्त्रालय अन्तर्गत स्थानीय पूर्वाधार विभाग सस्पेन्सन ब्रिज डिभिजनका प्राविधिक इन्जिनियर लगायतको टोली उक्त स्थानमा पुगेर २ झोलुंगे पुलको डिपिआर सर्भे गरेको हो ।

प्रतिनिधि सभा सदस्य देवीप्रकाश भट्टचन, पूर्व प्रतिनिधि सभा सदस्य प्रेमप्रसाद तुलाचन र लोघेकर दामोदरकुण्ड गाउँपालिकाका अध्यक्ष लोप्साङ छोम्फेल बिष्टको पहलमा ब्रिज डिभिजनको प्राविधिक टोली मुस्ताङ आएको हो ।

पुल डिपिआर सर्भेका लागि काठमाडौंबाट प्रभुको हेलिकोप्टरमार्फत प्रतिनिधि सभा सदस्य भट्टचनसहित डिभिजन प्रमुख कुमार थापा, इन्जिनियर प्रवेश रेग्मी र इन्जिनियर गोपालबहादुर थापा मुस्ताङ आएका थिए ।

ब्रिज डिभिजनको प्राविधिक टोली मुस्ताङको उच्चस्थानमा रहेको मुस्ताङको पवित्र धार्मिकस्थल दामोदरकुुण्ड जाने पदमार्ग सडकमा पुल सर्भे गर्न हेलीमार्फत त्यहाँ पुग्यो । उनीहरुले उक्त पखमार्गको भर्सा खोलामा झोलुंगे पुलको डिपिआर सर्भे गरेका हुन् ।

दामोदर कुण्ड तीर्थयात्राका लागि त्यस पदमार्गको भर्सा खोलामा झोलुंगे पुल स्थापना भएमा करिब ४ घण्टाको पैदल यात्रा दुरी छोटिने जनाइएको छ । दामोदरकुण्डको भर्सा खोला समुन्द्री सतहदेखि करिव ५ हजार १०७ मिटरको अग्लो उचाइमा रहेको र त्यहाँ पुल निर्माणका लागि प्रारम्भिक गृहकार्य भईरहेकाले डिपिआर सर्भे अघि बढाइएको सस्पेन्स ब्रिज डिभिजन प्रमुख कुमार थापाले जानकारी दिए ।

‘यो सर्भे र डिपिआर दुबै हो, डिपिआर फाइनल भएपछि योजना छनोटका लागि अघि बढ्छ,’ डिभिजन प्रमुख थापाले भने, ‘आगामी आर्थिक वर्ष पुलको योजना रातो कितावमा समावेश हुने र त्यसपछि अर्थ मन्त्रालयले स्रोत सुनिश्चित गरेपछि पुल निर्माणको ठेक्का अघि बढ्ने छ ।’

दामोदरकुण्ड पदमार्गको भर्सा खोलामा करिव ४६० मिटर लामो पुलको आवश्यकता पर्ने अर्को इन्जिनियर प्रवेश रेग्मीले बताए । उनले समुद्री सतहको उच्च उचाईको क्षेत्रमा पुल निर्माणका लागि डिपिआर सर्वे भएको जनाए । ‘डिपिआर सर्भे भयो, यसको डिपिआर बन्न ३ महिना लाग्छ,’ उनले भने, ‘त्यसपछि योजना अघि बढाउन सहज हुन्छ, हामीले यस योजनालाई निकै महत्वका साथ लिएका छौं ।

भगवान विष्णुको वासस्थानको रुपमा रहेको प्रसिद्ध धार्मिकस्थल दामोदरकुण्ड जोमसोम—कोरला राजमार्ग हुँदै चराङ पुगेर तल झर्नुपर्छ । यारा हुँदै पैदलमार्ग हुँदै दामोदरकुण्ड पुग्न करिब ९ घण्टाको समय लाग्छ । भर्सा खोलामा पुल नहुँदा दामोदकुण्ड जाने धार्मिक पदयात्री उकालो र आरोलो झर्नु पर्ने हुँदा दुरी लम्बिएको हो ।

पुल बनेपछि ९ घण्टाको पदयात्रा ५ घण्टामा पूरा गर्न सकिने लोघेकर दामोदरकुण्ड गाउँपालिकाका अध्यक्ष लोप्साङ छोम्फेल बिष्टले उल्लेख गरे । उनले दामोदकुण्ड जाने भर्सा खोलामा झोलुंगे पुलको आवश्यकता रहेको सुनाए ।

यसै गरी मुस्ताङको थासाङ गाउँपालिका—२ नाउरिकोट—गुरुसाङ्वो जोड्ने अर्को एक झोलुंगे पुलको पनि डिपिआर सर्भे भएको प्रतिनिधि सभा सदस्य देवीप्रकाश भट्टचनले जानकारी दिए । उनका अनुसार गुरु पद्मसम्भव ध्यान गरेर बसेको धार्मिक गुफा जाने पदयात्रीको सहजताका लागि त्यहाँ पुल निर्माणको प्रक्रिया अघि बढेको बताए । उनका अनुसार सस्पेन्स ब्रिज टोलीका प्राविधिक इन्जिनियरले त्यसस्थानमा पुगेर डिपिआर सर्भे गरेका हुन् ।

थासाङको नाउरिकोट—गुरुसाङ्वो गुफा जोड्ने पुल निर्माणको डिपिआरका लागि प्रतिनिधिसभा सदस्य देवीप्रकाश भट्टचनसहित पूर्व प्रतिनिधि सभा सदस्य प्रेमप्रसाद तुलाचन, लोघेकर दामोदरकुुण्ड गाउँपालिकाका अध्यक्ष लोप्साङ छोम्फेल बिष्ट र थासाङ—२ का वडाध्यक्ष गौतम शेरचनसहित प्राविधिक ईन्जिनीयरको टोली त्यसक्षेत्रमा पुगेको थियो । त्यहाँको प्रारम्भिक सर्वेमा करिव ४७० मिटर लामो झोलुंगे पुलको आवश्यकता महसुस गरिएको छ ।

थासाङको नाउरिकोट—गुरुसाङ्वो जोड्ने झोलुङ्गे पुल निर्माणका लागि यसअघि नै रातो किताबमा योजना समावेश भइसकेको छ । डिपिआर फाइनल भएपछि पुल निर्माणका लागि बजेट सुनिश्चिताको प्रक्रिया अघि बढ्ने सस्पेन्सन ब्रिज डिभिजनले बताएको छ ।

डिभिजन टोलीले दुबै स्थानमा पुल निर्माणको प्रक्रिया आगामी आर्थिक वर्षदेखि कार्यान्वयनमा ल्याउने गरी प्रक्रिया अघि बढाइने बताइएको छ । नाउरिकोट—गुरुसाङ्वो जोड्ने झोलुंगे पुल निर्माण भएमा करिब आधा घण्टाको पैदल उकालो दुरी छोटिने जनाइएको छ ।

मुस्ताङको दामोदरकुण्ड र थासाङमा झोलुंगे पुलको डिपिआर सर्भेका लागि प्रतिनिधि सभा सदस्य देवीप्रकाश भट्टनको हेली प्रयोग गरिएको थियो । प्रतिनिधि सभा सदस्य भट्टचनले आफ्नो जन्म मुस्ताङमै भएको र यहाँको विकासमा आफ्नो सक्दो सहयोग रहने बताए ।