पोखरा ।
प्रदेश खेलकुद परिषद गण्डकीका सदस्य सचिव श्रीधर शर्माले खेल संघहरूले दर्ता, नविकरण, अध्यावधिक र साधारण सभा नगर्ने संघहरूलाई कारवाही गर्ने चेतावनी दिएका छन् ।

गण्डकी प्रदेश तेक्वान्दो संघको वार्षिक साधारण सभाको शनिबार उद्घाटन गर्दै उनले निर्धारित मिति पुस २० गते भित्र दर्ता, नवीकरण, अध्यावधिक र साधारण सभा नगर्ने संघहरूलाई कारबाही गर्ने चेतावनी दिएका हुन् ।

समयभित्र दर्ता, नवीकरण, अध्यावधिक र साधारण सभा नगर्ने संघका प्रतिनिधिहरूले खेल संघको लेटर प्याड र छाप समेत प्रयोग गर्न नपाउने उनले जनाएका छन् । कसैले कानूनको पालना नगरेको खण्डमा सरकारी छाप कृति दस्तखत अन्तर्गत मुद्धा समेत हाल्ने सदस्य सचिव शर्माले जनाएका छन् । करिब २८ वटा खेलसंघहरू प्रदेशमा आबद्ध भएको उनले जनाएका छन् ।

खेलकुद प्रबद्र्धन र खेलाडी उत्पादनमा खेल संघ, क्लबहरू सहित केही संस्थाहरू रहेको उल्लेख गर्दै उनले खेलकुदको विकासको लागि संघहरूसँगै बसेर जिम्मेवारी दिने बताए । खेलकुद क्षेत्रमा बजेट कम भएको दाबी गर्दै उनले जनप्रतिनिधिहरूले यस विषयमा खासै आवाज उठाउन नसकेको गुनासो गरेका छन् ।

खेलकुदमा विशेष गरी मार्सल आर्ट खेलका केही संघहरूमा आर्थिक पारदर्शिता नभएको र ग्रेडिङमा समेत मनपरी रूपमा प्रशिक्षार्थी खेलाडीहरूबाट रकम उठाएको विषयमा परिषदको गम्भीर ध्यानाकर्षण भएको उनले जनाए । सदस्य सचिव शर्माले अबको सम्पूर्ण तयारी १०औं राष्ट्रिय खेलकुदका लागि अघि बढ्नु पर्ने जनाउँदै गण्डकीले पदक प्राप्त गर्ने गरी तेक्वान्दोलाई आफ्नो तयारी सुरू गर्न आग्रह गरेका छन् ।

कार्यक्रममा नेपाल तेक्वान्दो संघका उपाध्यक्ष हरिश्वर पोख्रेलले तेक्वान्दो खेलको विकासका लागि डोजाङहरूको स्थापना हुनुपर्नेमा जोड दिए । स्वस्थ नागरिक उत्पादनसँगै घर–घरमा तेक्वान्दो पुर्याउन डोजाङहरूको स्थापना आवश्यक रहेको उनको भनाइ थियो ।

गण्डकी प्रदेश तेक्वान्दो संघका अध्यक्ष जगनबहादुर गुरुङको अध्यक्षतामा भएको कार्यक्रममा संघका उपाध्यक्ष लक्ष्मी पाण्डे, महासचिव रमेश पौडेल, कोषाध्यक्ष माइकल कर्माचार्यले बोलेका थिए । कोषाध्यक्ष कर्माचार्यले आर्थिक वर्ष २०८०/०८१ मा आम्दानीतर्फ २९ लाख ६२ हजार ९ सय २८ र खर्चतर्फ २५ लाख २३ हजार ८ सय ६४ रहेको जानकारी दिएका छन् ।

बाँकी रहेको ४ लाख ३९ हजार ६४ रुपैयाँ यस वर्ष भुक्तानी गर्न बाँकी रहेका सेवा प्रदायकहरूलाई भुक्तानी गरिने भएको कोषाध्यक्ष कर्माचार्यले बताए । संघका अध्यक्ष गुरुङले पोखरा रंगशालामा निर्माण हुन लागेको तेक्वान्दो प्रशिक्षण हल निर्माण सम्पन्न गर्न सबैको सहयोगको अपेक्षा गरेका छन् ।