पोखरा ।

पोखरा महानगरपालिका वडा नं २० मा मासिक/साप्ताहिक दौड अन्तर्गत विद्यालय स्तरीय छात्रछात्रा ५ र ३ किमी दौड चैत २९ गते शनिबार हुने भएको छ । नेपाली अग्रज खेलाडीको छाता संस्था नेपाल भूतपूर्व खेलाडी मञ्चको आयोजना तथा पोखरा महानगर पालिका वडा नं २० को समन्वयमा दौड आयोजना हुन लागेको हो ।

मञ्चका अध्यक्ष दिलबहादुर गुरूङलेसो दौड पोखरा रंगशाला बाहिर पहिलो पटक आयोजना हुन लागेको जनाए । महानगरपालिकाभित्र रहेका ३३ वटै वडामा मासिक/साप्ताहिक दौड आयोजना गर्ने गरी मञ्चले योजना अघि बढाएको छ । उनले भने, ‘यो हाम्रोमात्रै पहलले हुँदैन । यसमा विशेषगरी पोखरा महानगरपालिका, सरोकारवाला, विद्यालयहरु विभिन्न संघ, संस्थाको सहकार्य आवश्यक छ ।’

मञ्चले पोखरालाई दौडै दौडको सहरमा अघि बढाउन तथा युवा खेलाडी उत्पादन हेतु विगत ३ महिनादेखि निरन्तर विद्यालयस्तरीय छात्र÷छात्रा दौड आयोजना गर्दै आएको छ । पोखरा रंगशालामा भएका तीन संस्करणको दौडमा विभिन्न विद्यालयका करिब ३ हजारभन्दा बढीको सहभागिता रह्यो ।