पोखरा ।
पोखरामा आयोजित प्रधानमन्त्री कप एक दिवसीय गण्डकी प्रदेशस्तरीय क्रिकेट प्रतियोगितामा बागलुङ दोस्रो खेलमा स्याङ्जासँग विशाल अन्तरले पराजित भएको छ । प्रादेशिक क्रिकेट संघ गण्डकीको आयोजनामा पोखरा रंगशालामा सेमबार भएको प्रतिस्पर्धामा स्याङ्जाले दिएको २ सय ७५ रनको लक्ष्य पछ्याउने क्रममा बाग्लुङ ७६ रनमै समेटिँदै फराकिलो हार व्यहोर्‍यो ।

टस जितेर ब्याटिङ गरेको स्याङ्जाले मिलन क्षत्रीको अविजित ६४ रनको महत्वपूर्ण इनिङमा ९ विकेटको क्षतिमा २ सय ७४ रनको विशाल लक्ष्य तयार गर्‍यो । निर्धारित ५० ओभर खेलेको स्याङ्जाले पहिलो विकेट सस्तैमा गुमायो । करन पंगेनी मुकेश ओझाको बलमा एलबी डब्लु धरापमा पर्दै पभेलियन फर्किए । इशान क्षत्रीले ३५ बलमा ३८ रन हिर्काउँदै गतिलो सुरुवात दिलाए । उनले ८ चौका प्रहार गरे ।

तेस्रो नम्बरमा आएका सञ्जय रेग्मीले १९ रनको योगदान दिँदा अनिष ताम्राकारले ३२ रन बनाए । किरण भट्टराईले ३८ बलमा ३२ रन बनाई खेल्दा मुकेश ओझाको हातबाट क्याच हुन पुगे । आठौं नम्बरमा आएका मिलन क्षत्रीले अर्धशतक पूरा गरे । उनले ६९ बल खेल्ने क्रममा ६४ रनमा अविजित रहे ।

उनले ५ चौका र २ छक्का प्रहार गरे । त्यसो त सुजन गौतमले १९ र विपिनराज न्यौपानले २५ रन बनाउँदा तुलसीराम भण्डारी १४ रनमा अविजित रहेका थिए । बागलुङका विश्व कार्कीको १०–१–३५–३ को बलिङ स्पेल रह्यो ।सचिनराज अधिकारीले भने २ विकेट लिने क्रममा ३ ओभरमा केवल १२ रन खर्चिएका थिए ।

विशाल लक्ष्य पछ्याएको बाग्लुङको ब्याटर खुलेर खेल्न सकेनन् । विवेक नेपाली ६ बल खेल्दै शून्यमै आउट भए । मिलन थापा पनि २६ बल खेल्दै ५ रनमा आउट भए । एकपछि अर्को गरी सस्तैमा पभेलियन फर्किने क्रम दोहोरिएपछि बागलुङ ७६ रनमा समेटिन पुग्यो । तेस्रो नम्बरमा आएका आरस तामाङले २२ रन बनाए ।

नवौं नम्बरमा आएका अश्विन थापाले १६ रनको योगदान गरे । अन्य ब्याटरको दोहोरो अंकको रन स्कोर कार्डमै चढ्न सकेन । किरण भट्टराईले ८ ओभरमा ३३ रन खर्चिएर ६ विकेट लिए । विपिनराज न्यौपानेले ४.४ ओभरमा १० रन खर्चिएर ३ विकेट लिए । किरण भट्टराई प्लेयर अफ दि म्याच घोषित भए ।