आमचुनावपछि करिब मध्यान्तरमा उपचुनाव भएको छ । धेरै चलचित्रको मध्यान्तरमा हुने अप्रत्याशित घटनाले कथामा नयाँ मोड ल्याउँछ । २०७४ को आमचुनावको मध्येमा भएको यो उपचुनावले पनि दलहरुलाई पुरानो विरासतको भर नपर्न र जनतालाई कमजोर नआँक्न सजग गराएको छ । मंसिर १४ गते भएको चुनावको परीणामसमेत सार्वजनिक भइसकेको छ । उपचुनाव सामान्य अवस्थामा गरिँदैन । विशेष अवस्थामा हुने उपचुनावको महत्व पनि विशेष र फरक हुन्छ भन्ने तथ्यलाई यो उपचुनावले फेरि पुष्टि गरिदिएको छ ।

५२ स्थानमा भएको चुनावको सबै नतिजा सार्वजनिक भइसकेको छ । चुनावी परिणाम दलहरुका लागि अप्रत्यासित देखियो । यो निर्वाचनको परिणामले सत्ता समीकरणमा कुनै बदलाव नआए पनि दलहरुलाई कार्य प्रणाली सच्याउने, जनतासम्म पुग्ने र आफ्ना एजेन्डाहरुलाई स्थापित गराउने मौका भने मिलेको छ । अर्काे अर्थमा यसले दलहरु र स्वतन्त्र उम्मेदवारहरुलाई पनि सबक सिकाएको छ । ५२ स्थानमा भएको चुनावमा यसअघि ४४ स्थानमा चुनाव जितेको नेकपा ३१ स्थानमा खुम्चियो । वामपन्थीको बर्चस्व रहेको धरान र भक्तपुरमा चुनाव जितेर कांग्रेसले राहत महसुस गरेको छ । कांग्रेसले १३, राष्ट्रिय जनमोर्चाले १, समाजवादी पार्टी नेपालले ४ र राजपाले ३ स्थानमा चुनाव जिते ।

चितवन, धरान र भक्तपुरका चुनावी परिणामले राजनीतिक वृत्तमा विशेष चर्चा पाएको छ । चितवनमा एकीकरण नहुँदै साबिक एमालेले जितेको वडाध्यक्ष माओवादी केन्द्रसँग एकीकरणपछि पनि नेकपाले गुमाएको छ । यसअघि फराकिलो अन्तरले चुनाव जितेको नेकपाले भक्तपुरको प्रदेशसभामा धक्का खाएको छ । यसअघिको आमचुनावका बागीलाई उम्मेदवार बनाएको नेकपाभित्र अझै भावनात्मक रुपमा एकता भई नसकेको यसले एकातिर देखाएको छ भने जनतामा लोकप्रिय नभएकालाई उम्मेदवार बनाउन नहुने शिक्षा पनि दिएको छ । लोकतान्त्रिक इतिहासमा धरान सधै वाम बर्चश्व भएको स्थानका रुपमा परिचित भयो । यसपालि भने कांग्रेसका तीलक राईले इतिहासमा नयाँ मोड सिर्जना गरे । नेकपा उम्मेदवार प्रकाश राईलाई फराकिलो मतान्तरले तीलकले हराए ।

२०१५ को पहिलो नगर चुनावमा धरान नगर प्रमुख जित्ने केदारनाथ खनाल वामपन्थी थिए । पञ्चायत कालका नगर प्रधानपञ्च जित्ने सूर्यप्रसाद उपाध्याय पनि वामपन्थी पृष्ठभूमिकै थिए । लोकतन्त्र आएपछि पनि सधै धरानको नेतृत्व वामपन्थीहरुले नै गरे । साबिक एमाले एक्लैले मेयर, उपमेयर जितेको धरानमा एकीकरणपछि पनि नेकपा उम्मेद्वारले हार व्यहोर्नु परेको छ । धरानको व्यवस्थित विकास, निर्माण गर्न नसक्नु र आश्वासनमात्र बाड्नु हारको एउटा कारक मानिएको छ भने नेकपाभित्रकै किचलोले पनि कांग्रेसको विजयलाई सहज बनाएको देखिन्छ । सुकुम्बासीको बाक्लो बसोबास रहेको धरानमा वामपन्थीले पटक पटक आश्वासन बाँडे तर उनीहरुलाई जग्गा दिलाउन सकेनन् । एकै ठाउँमा ३, ४ पटक बसपार्क शिलान्यास गरियो तर बसपार्क बन्ने अझै सुर छैन ।

कास्की २ मा नेकपाबाट विद्या भट्टराई विजयी भइन् । पति रवीन्द्रकै हाराहारी मतान्तरले विजयी विद्याले अब रवीन्द्रका सपनासँगसँगै कास्केली र नेपालीको सपना साकार पर्ने दायित्व निर्वाह गर्नुपर्छ । जनताले छुद्र टिप्पणीहरुलाई रुचाएनन् । वृद्धप्रति लक्षित प्रचण्डको टिप्पणी होस् कि कारकिरिया नगरेको भनी विद्या भट्टराई लक्षित चुनावी नारा, जनताले तिनलाई अस्वीकृत गरिदिए । केही अपवाद छाडेर, नेकपा र कांग्रेसबाहेक अधिकांश दल र स्वतन्त्र उम्मेदवारले धेरै ठाउँमा जमानतसम्म जोगाउन सकेनन् । राजनीति लहडमात्र नभएर जनसेवा, समर्पण र लक्ष्य प्राप्तिको मार्गचित्र पनि हो । घटनाक्रमले दिएको शिक्षा यही हो, शिक्षा ग्रहण गर्नेहरु शक्तिशाली हुन्छन्, नगर्नेहरु हराउँछन् ।