पोखरा । पोखरा महानगरपालिका वडा नं २९ मा रहेको दीपशिखा सामुदायिक पुस्तकालयको १८ औं साधारण सभा बिहीबार भएको छ । कार्यक्रममा पोखरा महानगरपालिका वडा नं २९ का वडाध्यक्ष श्रीप्रसाद गुरुङले यो पुस्तकालयका गतिविधिबारे राम्ररी जानकार रहेको तथा पछिल्ला दिनमा गरेको प्रगति प्रशंसनीय भएको जनाए ।
पुस्तकालयका अध्यक्ष कृष्णहरि भण्डारीको अध्यक्षतामा भएको कार्यक्रममा दीपशिखा सामुदायिक पुस्तकालयका सल्लाहकार बाबुराम गिरी, लेखनाथ उद्योग वाणिज्य संघका अध्यक्ष जानुका पराजुली, जनप्रकाश बहसमसखी क्याम्पसका प्रमुख ऋषि बुढाथोकी, लेखनाथ पत्रकार मञ्चका अध्यक्ष विष्णुहरि पौडेल। रिड नेपाल अन्तर्गतको टेक एज युथ परियोजनाकी विद्यार्थी मिनिशा नेपाली लगायतले बोलेका थिए ।

कार्यक्रममा पोखरा महानगरपालिकाका कार्यपालिका सदस्यसमेत रहेकी पुस्तकालय उपाध्यक्ष निर्मला पौडेलले स्वागत गरेकी थिइन् भने साधारणसभामा पुस्तकालयका कार्यसमितिका सचिव पदमप्रसाद अधिकारीको प्रगति प्रतिवेदनसहित भावी योजना, सामुदायिक पुस्तकालय संघ गण्डकीका अध्यक्षसमेत रहेका पुस्तकालयका कोषाध्यक्ष माधव भण्डारीकोे आर्थिक प्रतिवेदन पारित भएका थिए । यो पुस्तकालयका १ सय ८० आजीवन सदस्य छन् ।