समाधान संवाददाता

स्याङ्जामा थप ३ जनामा कोरोना पुष्टि भएको छ । वालिङका २ पुरुष र १ महिलामा आज कोरोना संक्रमण देखिएको स्वास्थ्य निर्देशनालय गण्डकीले जनाएको छ । नगरपालिकाले जेठ १२ गते उद्धार गरी ल्याएको ३ जनामा कोरोना देखिएको हो ।

स्वास्थ्य निर्देशक विनोदविन्दु शर्माका अनुसार २६ र २२ वर्षीय पुरुष र ३९ वर्षकी महिलामा कोरोना पोजेटिभ देखिएको हो । संक्रमितलाई उपचारका लागि स्याङ्जा जिल्ला अस्पतालमा लैजाने तयारी भइरहेको निर्देशक शर्माले जनाए । यसअघि वालिङकै २९ र २० वर्षीय पुरुषमा गत मंगलबार कोरोना पोजेटिभ देखिएको थियो ।

बागलुङको तमानखोला गाउँपालिकाको क्वारेन्टाइनमा रहेका ४ र बडिगाड गाउँपालिकाको क्वारेन्टाइनमा रहेका २ जनामा बुधबार कोरोना संक्रमण पुष्टि भएको थियो ।

नयाँ ३ जना संक्रमितसँगै गण्डकी प्रदेशमा संक्रमितको संख्या १५ पुगेको छ । अहिलेसम्म स्याङ्जाका ५, बागलुङका ८, नवलपुरका २ जनामा कोरोना देखिएको छ । १५ मध्ये बागलुङका १९ वर्षकी युवती र ६५ वर्षकी वृद्ध निको भएर चैत दोस्रो साता नै घर फर्किसकेका छन् ।

•