समाधान सम्वाददाता

सरकारले घोषणा गरेका पर्यटकीय गन्तव्यमा कास्कीबाट दुई ठाउँ थपिएका छन् । कास्कीका पर्यटकीय स्थल काहुँ धरहरा र पञ्चासे पर्यटकीय क्षेत्र पनि अबदेखि पर्यटकले घुम्नै पर्ने स्थानमा सुचिकृत भएका छन् ।

यसअघि संस्कृति पर्यटन तथा नागरिक उड्डयन मन्त्रालयले १ सय पर्यटकीय गन्तव्यको नाम सार्वजनिक गरेको थियो । त्यो सुचीमा कास्कीबाट सिद्द गुफा, मौजा होम स्टे र सिक्लेस परेका थिए ।

नयाँ पर्यटकीय गन्तव्य बनाएर पर्यटक आकर्षित गर्न विभिन्न जिल्लाका १ सय वटा स्थान पहिचान गर्दै मन्त्रालयले पूर्वाधार विकास गर्ने उल्लेख गरेको थियो । यसै गरी बाग्लुङ जिल्लाको पञ्चकोट पनि पर्यटकीय गन्तब्यका रुपमा सुचिकृत भएको छ ।

सरकारले घोषणा गरेको पर्यटकीय गन्तब्यको पूर्वाधार विकासका लागि मन्त्रालयले विशेष ध्यान दिने पर्यटन मन्त्री रविन्द्र अधिकारीले बताए । मन्त्री अधिकारीले कास्की सहित नेपालभर थपिएका पर्यटकीय गन्तब्यले नेपालमा पर्यटकको बसाई लम्ब्याउने विश्वास समेत व्यक्त गरे ।