पोखरा ।
डोट्याली कवि लोकराज भट्टको उपन्यास ‘छाइल’ पाठक माझ लोकप्रिय बन्दै गएको छ । यस उपन्यासमा सुदूरपश्चिमको सभ्यताको छायाँ (छाइल) छर्लङ्गै देखिन्छ । सरल एवं कलात्मक भाषामा लेखिएको उपन्यास पढ्नेहरू मोहित हुन्छन् ।

पाठक र लेखकबीच अन्तरक्रिया गराउन प्रकाशक ‘बुक्स हिमालय’ले आउँदो आइतबारदेखि मुलुकका प्रमुख सहरहरूमा ‘छाइल यात्रा’ शुभारम्भ गर्दैछ । बुक्स हिमालयका प्रमुख पवन शाक्यका अनुसार साउन २२ गते आइतबार पोखराको हिमालयन रिडर्स कर्नरमा अपरान्ह ४ः३० बजेटबाट ‘छाइल’ माथि विमर्श गरिनेछ ।

सुदूरपश्चिमका सांस्कृतिक अध्येता एवं कवि हेमन्त विवशले सहजीकरण गर्ने कार्यक्रममा समीक्षकद्वय सञ्जीव पौडेल र गौरी तमुले मिहीन ढङ्गले पुस्तककको समीक्षा गर्नेछन् । कार्यक्रममा साहित्यका शिखर पुरुष सरुभक्तले उपन्यासकार र साहित्य अनुरागीलाई आशीर्वचन प्रदान गर्नेछन् । त्यसैगरी पाठक र लेखकबीच अन्तरक्रिया पनि चलाइनेछ । पोखरामा कार्यक्रमको संयोजन ‘पुछारसिटे अभियान’ले गर्नेछ ।

पोखरा पछि चितवन, विराटनगर, नेपालगन्ज, धनगढी, हेटौंडालगायत सहरमा यस्तै कार्यक्रम गरिने प्रकाशकले जनाएको छ ।
भदौको दोस्रो साता चितवनमा पनि आयोजना गरिने विमर्श कार्यक्रमको समीक्षा भने कवि भूपिन र लक्ष्मी बरालले गर्नेछन् भने अग्रज उपन्यासकार रामबाबु घिमिरेले आशीर्वचन प्रदान गर्नेछन् । ‘जतिले यो उपन्यास पढेका छन् ती सबैबाट उत्साहजनक प्रतिक्रिया पाएको छु’, उपन्यासकार भट्ट भन्छन्, ‘पाठकको सल्लाह, सुझाब र आशीर्वाद शिरमा बोकेर अघि बढ्नेछु ।’ केही दिनअघि बुकहोलिक्सिले ‘छाइल’ माथि छलफल चलाएको थियो ।