पोखरा ।
दसैंको अवसरमा ग्राहकलाई विशेष छुट प्रदान गर्ने उद्देश्यका साथ सिटिजन्स बैंकले दराजसँग समझौता गरेको छ । सिटिजन्स बैंकका पदाधिकारी र दराजका प्रतिनिधिबीच बिहीबार काठमाडौं यसबारे सम्झौतामा हस्ताक्षर भएको छ ।

सम्झौता असोज १७ गतेबाट लागू हुने छ । दराजका पेमेन्ट म्यानेजर जोनाम भुर्तेल र बैंकका प्रमुख मास बैंकिङ अफिसर रोशन मानन्धरले सम्झौतामा हस्ताक्षर गरेका हुन् । अब सिटिजन्स बैंकको डेबिट कार्ड प्रयोग गरी प्रिपेमेन्ट गर्ने ग्राहकले अधिकतम १ हजार ५ सम्म छुट पाउनेछन भने क्रेडिट कार्ड प्रयोग गर्ने ग्राहकले अधिकतम २ हजारको छुट प्राप्त गर्ने छन् ।

यो अफरको लाभ लिन ग्राहकले दराज एप वा वेबसाइटमार्फत सिटिजन्स बैंकका भौचर संकलन गर्नुपर्नेछ, जुन खरिद प्रक्रियामा आफैं लागू हुनेछ ।

बैंकले डिजिटल बैंकिङ माध्यमहरुको प्रयोगलाई बढाउन र ग्राहकलाई डिजिटल माध्यमबाट भुक्तानी गर्न प्रोत्साहन गर्न समय समयमा ग्राहकमैत्री सुविधा सञ्चालनमा ल्याउँदै आएको छ । डिजिटल कारोबार गर्दा पाइने छुटसम्बन्धी विस्तृत विवरण सिटिजन्स बैंकको वेबसाइटमा प्राप्त गर्न सकिनेछ ।

सिटिजन्स बैंक इन्टरनेसनल लिमिटेडले देशैभरी १ सय ८८ शाखा, १ सय ४८ एटिएम, ३ विस्तार काउन्टर र ९७ शाखारहित बैंकिङ इकाइबाट १६ लाख ५० हजारलाई सेवा दिइरहेको छ ।