समाधान संवाददाता
पोखरा

नेपालमा यामाहा एफसिएस एफआईको तेस्रो पुस्ता (भी ३.०) सार्वजनिक भएको छ । यो फ्युल इन्जेक्सन प्रविधि र एन्टिलक ब्रेकिङ सिस्टम दुवै भएको १ सय ५० सिसीको पहिलो मोटरसाइकल हो । नेपालका लागि यामाहा मोटरसाइकल तथा स्कुटरको आधिकारिक बिक्रेता एमएडब्लु इन्टरप्राइजेज प्रालिले मोटरसाइकल भित्र्याएको हो ।

यसबाट यामाहा आफ्ना ग्राहकको सुरक्षा तथा सबैखाले मौसम र सडक अवस्थामा पनि अद्वितीय ‘राइडिङ एक्सपिरियन्स’ दिलाउन प्रतिबद्ध भएको प्रमाणित हुने कम्पनीको दाबी छ । नयाँ वर्ष २०७६ मा अवसरमा आएको यो मोटरसाइकलको प्रारम्भिक मूल्य ३ लाख ९ हजार ९ सय छ ।

यसमा १ सय ४९ सिसीको सिंगल सिलिन्डर, फ्युल–इन्जेक्टेड ब्लुकोर इन्जिन छ । यसले अधिकतम १३.२ बिएचपी पावर र १२.८ एनएम टर्क उत्पन्न गर्छ । यसमा अघिल्लो पुस्तामा झैं ५ स्पिड गियरबक्स छ भने अगाडि ४१ एमएमको टेलिस्कोपिक फर्क र पछाडि मोनो सक प्रयोग गरिएको छ । यसको फ्रन्ट र ब्याक दुवै ह्विलमा डिस्क ब्रेकको व्यवस्था छ ।

राइडरको सुरक्षालाई मध्यनजरमा गरी यामाहाले एफजिएसको तेस्रो पुस्तामा सिंगल च्यानल एबिएस जडान गरेको छ जसले ब्रेकिङ कन्ट्रोललाई जबर्जस्त बनाइदिएको छ । नयाँ मोटरसाइकलको फ्युल ट्यांक क्षमता १२.८ लिटरको छ ।