सुरेशराज अधिकारी
पोखरा

गण्डकी प्रदेश सभा सदस्य राजीव गुरुङ (दीपक मनाङे) ले अखिल नेपाल फुटबल संघ (एन्फा) कास्की अध्यक्ष मीलन गुरुङमाथि मंगलबार हातपात गरेका छन् ।

पोखराको भण्डारढिकस्थित खेल मैदानमा मंगलबार सुरु मुख्य मन्त्री कप फुटबल प्रतियोगिता उद्घाटन हुनुअघि सांसद राजीवले मीलनलाई कुटेका हुन् । कार्यक्रमका प्रमुख अतिथि मुख्यमन्त्री पृथ्वीसुब्बा गुरुङ कार्यक्रमस्थल पुग्नु अगाडि भनाभन हुँदा सांसद राजीवले अध्यक्ष मीलनलाई गालामा झापड हान्दै लात्तीले तिघ्रामा हानेको प्रत्यक्षदर्शीले बताए । प्रतियोगितामा भाग लिन मनाङबाट डाँफे लालीगुराँस युवा क्लबको टोली पोखरा आएको छ ।

मंगलबार सुरु हुने प्रतियोगिताका लागि मनाङबाट माघ १ गते नै टोली आए पनि खेलाडीलाई खानेबस्ने प्रबन्ध नगरेको र अभ्यासस्थल पनि नदिएको भन्दै सांसद राजीवले हातपात गरेका हुन् । अध्यक्षमाथि किन हात हाल्नुभयो त भन्ने सञ्चारकर्मीको प्रश्नमा सांसद राजीवले भने, ‘मैले हात हालेको हैन झापड हानेको हुँ, यो मान्छे करप्टेड रहेछ ।’ प्रतियोगिताका लागि बोलाइसकेपछि सबै प्रबन्ध आयोजकले नै गर्नुपर्ने उनको जिकीर थियो । अनियमितता गर्नेलाई कारवाही गर्ने अन्य संस्था पनि ‘करप्टेड’ भएकाले आफूले झापड हानेको सांसद राजीवले स्वीकार गरे ।

आयोजक एन्फा कास्की अध्यक्ष मीलन गुरुङ प्रतियोगिता हुनुभन्दा १ दिन अघिदेखि मात्र खेलाडीलाई खाने बस्ने प्रबन्ध गर्ने नियम भएकाले आफूले त्यही अनुसार गरेको र कुनै अनियमितता नगरेको बताउँछन् । मनाङको खेल बुधबार भएकाले मंगलबारबाट मात्र उसको खर्च बेहोर्ने प्रावधान छ ।

उनले अभ्यासका लागि पोखरास्थित संघीय प्रहरी इकाई कार्यालयको खेलमैदानमा प्रबन्ध गरेको बताए । मीलनले सांसद राजीवले पहिला धकेलेर गालामा झापड हानेको र त्यसपछि लात्ताले तिघ्रामा हानेको बताए । उनले भने, ‘पिट्न मैले पनि सक्थें तर हात फर्काइनँ ।’ यसबारेमा आफूले कहिँ कतै उजुरी नगर्ने बताए ।

मारापिटी गर्नहुन्नः मुख्यमन्त्री गुरुङ
खेलमैदानमा घटना भएको करिब २ मिनेटपछि मुख्यमन्त्री पृथ्वीसुब्बा गुरुङ कार्यक्रम प्रवेश गरेका थिए । उनलाई यो घटनाको बारेमा कसैले जानकारी गराएको थिएन । उद्घाटनपछि विगतका घटना औंल्याउँदै मुख्यमन्त्री गुरुङले भने, ‘खेल भैरहँदा धेरै ठाउँमा विवाद र मारापिटी हुन्छ, भयो भने यस्ता ठाउँमा फुटबल खेल्ने र खेलाउने कुरा पछि हट्दै जान्छ ।’ प्रतियोगितालाई सफल बनाउन र शन्तिपूर्वक सम्पन्न गर्न स्थानीयस्तरबाट सहयोग हुनेपर्ने भनाइ उनको थियो ।

उनले प्रदेशको विकासका लागि खेल पर्यटन प्रवद्र्धन गर्ने प्रतिबद्धता समेत जनाए । उनले तल्लो तहबाट विकास गर्न सकेमात्र खेलकुदमा माथिल्लो तहको विकास हुने बताए ।

राजीव मञ्चमा गएनन्
खेलमैदानमा हातपात भएको केहीबेरमै औपचारिक कार्यक्रम सुरु भएको थियो । त्यसो त प्रमुख अतिथि आउन बाँकी रहेकाले आसनग्रहण भइरहेको थियो । त्यहीबीचमा सांसद राजीव आफ्ना समर्थक र खेलाडीसहित खेलमैदानमा प्रवेश गरे । सिधै मीलन भएतिर गएर भनाभन गर्न थाले र हातपात पनि गरे । करिब डेड मिनेटजतिमा भनाभन र हातपात भइसकेको थियो । घटनालगत्तै आयोजकले आसनग्रहणका लागि सांसद राजीव गुरुङलाई मञ्चमा बोलाएका थिए । तर उनी मञ्चमा नगइ प्यारापिटमै बसे । पहिलो खेलको मध्यान्तरपछि उनी बाहिरएका थिए । त्यतिबेलै उनले पत्रकारसँग कुराकानी गरेर आफ्नो भनाइ राखेका थिए ।

को हुन् राजीव
राजनीतिक रुपमा लामो समय नेपाली कांग्रेसको तरुण दलमा आबद्ध राजीव गुरुङ पछिल्लो समय राप्रपामा थिए । स्वतन्त्र रुपमा उठेका उनी तत्कालीन एमालेको सहयोगमा प्रदेश सभा चुनावमा मनाङ ‘ख’ बाट निर्वाचित भएका हुन् । निर्वाचित भएको १६ महिनापछि २०७५ माघ १४ गते सभामुख नेत्रनाथ अधिकारीबाट सांसदको सपथ खाएका थिए । निर्वाचन लगत्तै उनमाथि फौजदारी अभियोग लागेका कारण केही समय सम्पर्कमा नरहेका गुरुङलाई २०७५ वैशाखमा प्रहरीले पक्राउ गरेको थियो । सर्वोच्चको आदेशले छुटेपछि उनी पोखरा आएर सपथ खाएका हुन् । उनलाई गत असार १९ मा नेकपा प्रदेश इन्चार्ज तथा मुख्यमन्त्री पृथ्वी सुब्बा गुरुङले पार्टीमा भित्र्याएका हुन् ।

उजुरी नपरी कारवाही गर्न मिल्दैन
कुटाइ खाएका एन्फा अध्यक्ष मीलन गुरुङले मंगलबार साँझसम्म प्रहरी प्रशासनमा जाहेरी दिएका छैनन् । पीडकले जाहेरी दर्ता नभई प्रहरीले कारवाही प्रक्रिया अगाडि बढाउन नमिल्ने जिल्ला प्रहरी कार्यालय कास्कीका प्रवक्ता डिएसपी राजकुमार केसीले बताए । उनले भने, ‘पीडकले अन्यत्र जे कुरा भने पनि प्रहरीमा निवेदन नदिएसम्म त्यसबारेमा मुद्दा उठान हुँदैन, अहिलेसम्म उजुरी परेको छैन ।’