प्रदेश १ मा थपिए ३ संक्रमित, मुलुकभर २ सय ९४

समाधान संवाददाता २०७७ जेठ ४ गते २०:०१

पाेखरा

प्रदेश १ मा थप ३ जनामा कोरोना भाइरस (कोभिड–१९) संक्रमण पुष्टि भएको छ । थपिनेमा २ मोरङ र १ जना धनकुटाका छन् ।

मोरङको विराटनगरकी १ महिला र एक पुरुष साथै धनकुटाकी एक महिलामा कोरोना संक्रमण पुष्टि भएको हो ।

धरानस्थित बीपी कोइराला स्वास्थ्य विज्ञान प्रतिष्ठानमा गरिएको परीक्षण अनुसार धनकुटाको ३४ वर्षीय महिला, विराटनगरका ३५ वर्षीय पुरुष र २९ वर्षीय महिलामा कोरोना पुष्टि भएको हाे ।

प्रदेश १ मा कोरोना भाइरस पुष्टि भएकाको जम्मा संख्या ३९ पुगेको मुख्यमन्त्री तथा मन्त्रिपरिषदको कार्यालयले जनाएकाे छ ।

यसअघि उदयपुर, झापा, भोजपुर र मोरङमा कोरोना संक्रमित देखिएका थिए भने आइतबार नयाँ जिल्ला धनकुटा पनि थपिएको छ । 

नेपालभर भने कोरोना संक्रमितको संख्या २ सय ९४ पुगेको छ । जसमध्ये २ जनाको मृत्यु भएको छ भने ३६ जना डिस्चार्ज भएका छन् । 
 

तपाईको प्रतिक्रिया