समाधान संवाददाता
अत्यधिक रक्तश्रावका कारण हेलिकोप्टर मार्फत उद्दार गरी पोखरा स्वास्थ्य विज्ञान प्रतिष्ठानमा उपचारका लागि ल्याइएकी म्याग्दीकी गर्भवती महिलाको स्वास्थ्य सामान्य रहेको बताइएको छ । म्याग्दी अन्नपूर्ण गाउँपालिका ५ शिखकी २६ वर्षीया नर्दिता गर्बुजाको उपचार भइरहेको र चिकित्सकका अनुसार स्वास्थ्य सामान्य अवस्थामा रहेको उनका श्रीमान् होमबहादुर गर्बुजा पुनले जानकारी दिए ।

‘शरीरमा जम्मा भएको पानी केही मात्रामा निकालिएको छ,’ उनले भने, ‘डाक्टरले भनेअनुसार उनको स्वास्थ्य सामान्य छ । थप उपचारको लागि पनि प्रक्रिया बढाइएको छ ।’ बच्चालाई जन्म दिनुपर्ने भएकाले त्यसअनुसारको उपचार भइरहेको उनका श्रीमान् पुनले बताए । गर्बुजाको ७ वर्षको पहिलो छाेरी छन्।

अवस्था जटिल भएपछि स्वास्थ्य चौकीको पहलमा तत्कालै उद्दार सम्भव भएको पुनले बताए । पोखरा ल्याउन पाएपछि आमा र बच्चा दुबैको जोखिम टरेको उनले सुनाए ।

७ महिनाकी गर्भवती गर्बुजाको पेटमा २ वटा बच्चा रहेको शिख स्वास्थ्य चौकीकी इन्चार्ज तथा अनमी डिलकुमारी पाइजाले बताइन् । गर्बुजा नियमित स्वास्थ्य जाँचका लागि वडाकै स्वास्थ्य चौकीमा जाने गरेकी थिइन् ।
‘उहाँले केहीसमयअघि देखि नै पेट दुख्यो भन्नुहुन्थ्यो,’ अनमी पाइजाले भनिन्, ‘जिल्ला अस्पताल बेनीमा भिडियो एक्सरे गर्न मैले सल्लाह दिएकी थिए । रिपोर्टले जुम्ल्याहा बच्चा बसेको देखाएको थियो ।’ शरीरमा पानीको मात्रा आवश्यकता भन्दा बढी देखिएको उनले सुनाइन् ।

स्वास्थ्य चौकीमा समाधान गर्न नसकिने केस भएकाले पाइजाले नै स्वास्थ्य निर्देशनालयमा सम्पर्क गरेर उद्दार गर्न आग्रह गरेकी थिइन् ।

दुर्गम भेगका गर्भवती महिलालाई स्वास्थ्य सुरक्षा दिने हेतुले गण्डकी प्रदेश सरकारले हेलिकोप्टर उद्दार गर्दै आइरहेको छ । सामाजिक विकास मन्त्रालयको निर्देशनमा आइतबार बिहानै गर्बुजाको हेलिकोप्टर मार्फत उद्दार गरिएको थियाे ।