मुस्ताङमा काेराेना कहरः महिना दिनअघि आमा बितिन्, अहिले छाेरा

समाधान संवाददाता २०७८ जेठ १२ गते १०:२४

सुन्दरकुमार थकाली÷जोमसोम

कोरोनाको दोश्रो लहरसंगै हिमाली जिल्ला मुस्ताङमा कोरोनाका कारण एक महिना नपुग्दै आमापछि छोराको मृत्यु भएको छ ।

करिब १ महिनाअघि कोरोनाबाट मुस्ताङको घरपझोङ —४ जोमसोममा मृत्यु भएकी ७२ वर्षिया महिलाको मृत्यु भएकाे थियाे । अहिले उनै वृद्धाका कान्छा छाेरा ४३ वर्षीय कर्माछिरिङ गुरुङको पोखरा स्थित चरक मेमोरियल अस्पतालमा उपचार गर्ने क्रममा मृत्यु भएकाे हाे । यही सोमबार उनकाे मृत्यु भएको घरपझोङ गाउँपालिकाले जनाएको छ।

मुस्ताङमा पहिलो पटक कोरोना संक्रमण पुष्टि भएकी ७२ महिलाको गत बैशाख १६ गते राती जोमसोम अस्पतालमा उपचारका क्रममा मृत्यु भएको थियो । तिनै महिलाको कान्छा छोराकाे जोमसोम अस्पतालमा बैशाख २० गते कोरोना एन्टिजेन परीक्षण गर्दा संक्रमण पुष्टि थियो । कोरोनासहित स्वास्थ्य अवस्था असहज महशुस गरेका उनी आफै पोखराको चरक मेमोरियल अस्पतालमा भर्ना भएका थिए । अस्पताल भर्ना भएको दुई हप्तामा उनको मृत्यृ भएको हो ।

कोरोनाबाट मृत्यु भएका गुरुङको जेठ २ गते पूनः पीसीआर परीक्षण गर्दा संक्रमण पुष्टि भएको थियो । घरपझोङ गापाका स्वास्थ्य संयोजक कर्णबहादुर थकालीका अनुसार श्वाश÷प्रश्वास तथा निमोनियाका कारण आमाको मृत्यु भएको २५ दिनपछि कोरोनाका कारण छोराको मृत्यु भएको छ ।

स्वास्थ्य संयोजक थकालीका अनुसार लामो समयदेखि जापानमा बस्दै आएका गुरुङ दम्पती २ महिनाअघि मात्र मुस्ताङ आएका थिए ।

योसंगै मुस्ताङमा कोरोनाबाट ज्यान गुमाउनेको संख्या ८ पुगेको ।जिल्ला स्वास्थ्य कार्यालय मुस्ताङका प्रमुख टिकाराम भण्डारीले जानकारी दिए । उनका अनुसार कोरोनाबाट घरपझोङमा ३ जना ,वारागुङ मुक्तिक्षेत्रमा ३ जना र थासाङ गापामा २ जना व्यक्तिले ज्यान गुमाएका छन् ।

कोरोनाको दोश्रो भेरियन्टसंगै पछिल्लो ३ हप्तामा हिमाली जिल्ला मुस्ताङमा संक्रमितको संख्या २ सय ९२ पुगेको छ । जसमध्ये ८९ जना व्यक्तिले कोरोना जितेको स्वास्थ्य कार्यालयले जनाएको छ । मुस्ताङको घरपझोङमा ७६ संक्रमित मध्ये ४० जना ,थासाङमा ७३ संक्रमित मध्ये १७ जना र वारागुङ मुक्तिक्षेत्र गापामा १ सय ३४ संक्रमित मध्ये ३२ जनाले कोरोना जितेका हुन् । यस्तै उपल्लो मुस्ताङको लोमान्थाङमा ९ जना संक्रमित छन् भने लोघेकर दामोदरकुण्ड गापा कोरोना मुक्त छ ।

मुस्ताङबाट पछिल्लो ३ हप्तामा कोरोनाका कारण २२ जना व्यक्तिको जोमसोम अस्पतालबाट रिफर भएका छन् भने १ सय ६८ जना सक्रिय संक्रमित होमआईसोलेसन र १६ जना संक्रमित जोमसोम अस्पताल र स्थानीय तहका कोभिड आईसोलेसनमा छन् ।

स्वास्थ्य कार्यालय मुस्ताङका अनुसार हालसम्म एक हजार २२ जनाको एन्टिजेन परीक्षण गर्दा १ सय ९१ ज्ना व्यक्तिमा संक्रमण पुष्टि भएको हो भने १ सय ७९ जना व्यक्तिको नमूना स्वाब संकलन गरी पीसीआर परीक्षण गर्दा १ सय १ जना व्यक्तिमा संक्रमण देखिएको हो ।मुस्ताङमा मंगलबारसम्म १ सय ७४ जना संक्रमित रहेको जनाईएको छ ।

तपाईको प्रतिक्रिया