मित्रमिलन सहकारी ठगीमा अध्यक्षकी श्रीमतीलाई पनि उजुरी, जग्गा जोडेको आरोप

समाधान संवाददाता २०८० माघ २१ गते २०:५०

पोखरा
पोखरा–९ नयाँ बजारमा रहेको मित्रमिलन सहकारी संस्था ठगीको अनुसन्धानको दायरा फराकिलो बनाउन बचतकर्ताले माग गरेका छन् । उक्त माग सम्बोधनका लागि उनीहरुले जिल्ला प्रहरी कार्यालयमा उजुरीसमेत दिएका छन् ।

Advertisement


सहकारीका अध्यक्ष रमण पौडेल र उनकी श्रीमती सौजना अधिकारीले पदको दुरुपयोग गर्दै सहकारीकै रकमबाट जग्गा लिई ठगी गरेको आरोप उजुरीमा लगाइएको छ । ‘ठगीमा समावेश हुँदा पनि निज सौजनालाई किन कानुनी दायरामा नल्याएको भन्ने विषयमा हाम्रो गम्भीर आपत्ति छ,’ आइतबार दिइएको उजुरीमा भनिएको छ, ‘रमण अध्यक्ष हुँदा पदको दुरुपयोग गर्दै उनकी श्रीमती सौजना अधिकारीको नाममा हामी सर्वसाधारणको बचत रकमबाट निजी सम्पत्ति जोडी एकल भोगचलन गरेको प्रमाण सहित पेस गरेका छौं ।’ ७० जनाभन्दा बढी बचतकर्ताको हस्ताक्षरसहितको उजुरी प्रहरीकहाँ परेको हो ।


उनले कास्कीकोटमा ७७ साल माघ १८ गते सैजनाको नाममा २ कित्ता गरी १/१ रोपनी जमिन र बेगनामा ७८ असार ३१ गते साढे १२ रोपनी जमिन खरिख भएको लालपुर्जाको छायाकपीसमेत बचतकर्ताले उजुरीमा समावेश गरी बुझाएका छन् ।
कुनै आर्थिक स्रोत नभएतापनि सहकारीका बचतकर्ताको रकमबाट रमण पौडेल संस्थाको अध्यक्ष भइसकेपश्चात पोखरा ९ न्युरोडस्थित ब्रोकर नम्बर १४ बाट श्रीमती सौजना अधिकारीको नाममा २ करोड बढीको सेयर, रमणको नाममा ५ करोड बढीको सेयर र प्रबन्धक किरण अधिकारीको नाममा २ करोड बढीको सेयर खरिद गरेको पनि उजुरीमा उल्लेख छ ।

‘निजलाई पनि तुरुन्तै पक्राउ गरी आवश्यक अनुसन्धान गर्न जोडदार माग गर्दछौं,’ उजुरीमा भनिएको छ, ‘संलग्न प्रमाणहरुका आधारमा हिनामिनामा संलग्न भएका भएका केही अनुसन्धान गर्नुपर्ने व्यक्तिहरुलाई अनुसन्धानमा ल्याउन छुट भएकाले सोको जानकारीसहित यथाशीघ्र अन्य ३३ जना सरह नै अनुसन्धान गर्न हार्दिक अनुरोध गर्दछौं ।’


संस्थाको रकम हिनामिना गर्ने उद्देश्यले सहकारी ऐन २०७४ को दफा ४८ (२) विपरीत तेस्रो साधारण सभामा आफूहरू एउटै परिवारको नरहेको स्वघोषणा गर्दै एउटै परिवारका श्रीमान रमण पौडेल सञ्चालक समितिको सचिव र उनकी श्रीमति सौजना अधिकारी लेखा समितिको सदस्यमा उम्मेदवारी दिएको पनि बचतकर्ताहरुले दिएको उजुरीमा उल्लेख छ । मित्रमिलन सहकारी ठगी प्रकरणमा अध्यक्ष पौडेल, प्रबन्धक अधिकारीसहित आधा दर्जन पक्राउ परी पुर्पक्षका लागि कारागारमा छन् भने २ दर्जन अझै फरार छन् ।

Advertisement

ऋणीले ऋण तिर्न नसक्दा धितो जमिन सहकारीकै सम्पत्तिको नाममा रुपान्तरण गर्नुको साटो व्यक्तिगत बनाएको उजुरीकर्ताको आरोप छ । त्यसरी नै ऋण तिर्न नसकेका ऋणीका जमिनको रोक्का राखेको आरोप पोखरा २१ का वडाध्यक्ष दीपक सुवेदीमाथि लागेको छ । पक्राउ पुर्जी जारी भएपछि उनीचाहिँ फरार छन् ।

तपाईको प्रतिक्रिया