समाधान संवाददाता, पोखरा

सरकारले शनिबारदेखि लागु हुनेगरी दूधको मूल्य बढाएको छ । कृषि तथा पशुपंक्षी विकास मन्त्रालयले प्रतिलिटर ६ रुपैयाँ मूल्य बढाउन दुग्ध विकास संस्थानलाई पत्राचार गरिसकेको छ ।

बढेको मूल्यअनुसार कृषकले ६९ प्रतिशत अर्थात् ४ रुपैयाँ १६ पैसा र दुग्ध व्यवसायीले ३१ प्रतिशत अर्थात् १ रुपैयाँ ८४ पैसा पाउनेछन् । यसअघि दूधको मूल्य बढाउनेबारे अध्ययन गर्न गठित कार्यदलले कम दूध उत्पादन हुने मौसममा १० रुपैयाँ र बढी उत्पादन हुने मौसममा प्रतिलिटर ५ रुपैयाँ ७९ पैसा मूल्य बढाउन सकिने प्रस्ताव गरेको थियो ।

अहिले दूधको मूल्य प्रतिलिटर ७० रुपैयाँ छ । नेपाल डेरी एसोसिएसन महासचिव प्रह्लाद दाहालका अनुसार मूल्य बढेपछि उपभोक्ताले प्रतिलिटर ७६ रुपैयाँ तिर्नुपर्नेेछ ।