पोखरा- गत वैशाखमा पोखराबाट एक बालयौन दुराचारी पक्राउ परे । अमेरिकी नागरिक माइकल नर्मन टेलरलाई प्रहरीले पक्राउ गरी अनुसन्धान अघि बढायो । उनलाई प्रहरीले अदालतमा उभ्याएपछि उनको बयान लिँदा अदालतमा समस्या आयो । उनी नेपाली बुझ्दैनथे । अंग्रेजीमै बुझाउनु पर्ने भएपछि मान्छे लगाएर दोभाषेको काम दिइयो ।

धर्म परिवर्तनको आरोपमा पक्राउ परेका ४ कोरियालीले कोरियन भाषा बाहेक अन्य भाषा बुझ्दैनथे । न अंग्रेजी बुझ्ने न त अरु भाषा नै । उनीहरुले आफ्नै दोभाषे ल्याएका थिए । सोही दोभाषेको साथमा जिल्ला प्रहरी कार्यालयमा बयान लिइयो । अदालतमा पनि उही दोभाषेकै सहयोगमा थुनछेक बहस चलाइयो ।

अदालतमा सेवा लिन आउने र नेपाली भाषा बोल्न र बुझ्न नसक्ने सेवाग्राही आए अदालतले विश्व भाषा केन्द्रबाट सहयोगी लगेर काम गर्ने गरेको छ । अदालतले अब भने अदालतमै दोभाषे राख्ने भएको छ । कास्की जिल्ला अदालतले सूचना जारी गर्दै आवेदन दिन भनेको छ । गुरुङ, नेवारी, चाइनिज, स्पेनिस, रसियन लगायत भाषा बोल्न र लेख्न सक्नेले आवेदन दिन सक्नेछन् ।

अदालतले दोभाषेसँगै स्वेच्छिक कानूनी सहायता (प्रो वोनो सेवा) दिन इच्छुक कानून व्यवसायीको सूची तयार गर्ने भएको छ । जिल्ला अदालत नियमावली, २०७४ को नियम १०४ मा प्रो वोनो सेवा बारे उल्लेख छ । प्रो वोनो सेवा दिन चाहने कानून व्यवसायीले निशुल्क सेवा दिन्छन् । असहाय, अशक्त, नाबालक र आर्थिक रुपमा विपन्न परिवारलाई उनीहरुले निशुल्क सेवा दिन्छन् । यही कामका लागि अदालतले वैतनिक वकिल पनि राख्ने गरेको छ ।