समाधान

मुक्तिनाथ विकास बैंक लिमिटेडले वित्तीय साक्षरता कार्यक्रम गरेको छ । वित्तीय कारोबार बारे चेतना जगाउने, विद्यार्थी भविष्यको योजना, सुरक्षित बचत, कर्जा तथा विप्रेषणबाट प्राप्त रकमको उत्पादनमूलक लगानी, पारिवारिक बजेट तथा योजनामा जानकारी दिएको हो ।

बैंकले ‘आजको आवश्यकता, विद्यार्थीहरुमा वित्तीय साक्षरता’ मूल आशयले विरगंज महानगरपालिका ११ पर्सास्थित विरगंज क्याम्पसमा जोखिम न्यूनीकरणका लागि बिमाको प्रयोग, सफा नोट बारेमा प्रशिक्षण दिएको थियो । साक्षरता कार्यक्रममा सभ्यताको प्रतिक, बैंक तथा वित्तीय संस्थाको प्रकार लगायतको विषयमा वित्तीय चेतना अभिवृद्धि गराएको बैंकले जनाएको छ ।

विद्यार्थीलाई आय र ब्यय लेखाजोखा गर्ने, फजुल खर्च कम कसरी गर्ने लगायतका विषयमा ज्ञान दिइएको थियो । कार्यक्रममा १ सय जना विद्यार्थीको सहभागीता थियो । बैंकले सञ्चालन गरेको वित्तीय साक्षरता कार्यक्रममा ४५ हजार ३ सय ८० जना स्थानीय तथा विद्यार्थी सहभागी भइसकेको बैंकको दावी छ ।

कार्यक्रममा प्राचार्य विनोदकुमार गुप्ताले मुक्तिनाथ विकास बैंकले वित्तीय साक्षरतामार्फत विद्यार्थीमा वित्तीय चेतना र वित्तीय ज्ञानमा अभिवृद्धि गराउन सफल भएको धारणा राखेका थिए ।