बागलुङ, ताराप्रसाद शर्मा

बागलुङ गल्कोट नगरपालिका ११, रिघामा करिब २ अर्बको लागतमा ९ दशमलव ६ मेगावाट क्षमताको विद्युत उत्पादनको काम तीव्र गतिमा भइरहेको छ । १ अर्ब ८८ करोडको लागतमा विद्युत परियोजनाको काम भइरहेको हो । सिभिल वर्कको ठेक्का रामेछाप शेर्पा कन्सट्रक्सनले लिइरहेको छ भने हाइड्रो मेकानिकल कामको जिम्मा नर्थ हाइड्रोले पाएको छ ।

करिब १६ महिनाको अवधिमा विद्युत उत्पादनको काम पूर्ण गरी केन्द्रीय प्रसारणलाइनमा जोडिने भएको छ । गत वैशाखबाट निर्माण थालिएको आयोजनाको बाँध निर्माणको काम २ महिनादेखि तीव्र गतिमा भइरहेको छ ।

आगामी असार मसान्तसम्म पाइपलाइन विस्तार गर्ने गरी ५० प्रतिशत काम सम्पन्न हुनेछ भने करिब ४ हजार २ सय ५० मिटर पाइप विस्तार गरी मनेवामा पावरहाउस निर्माण गरी ९ दशमवल ६ मेगावाट क्षमताको विद्युत उत्पादन गर्न लागिएको दरमखोला हाइड्रो इनर्जी कम्पनीका अध्यक्ष नीरज पुनले जानकारी दिए ।
विद्युतका लागि लगानी भने ३० प्रतिशत स्थानीय तथा बाँकी ७० प्रतिशत बंैकले गर्ने भएको पुनले बताए । जस अनुसार ५७ करोड रुपैयाँ स्थानीयले जम्मा गर्ने छन् र जसका लागि ७ कम्पनीले लगानी जुटाउने छन् । बाँकी विभिन्न बंैकमार्फत ऋण लगानी हुने पुनको भनाई छ ।

स्थानीयले हालसम्म आफूहरूले जम्मा गर्नुपर्ने रकमको ५० प्रतिशत अर्थात् करिब ३० करोड रुपैयाँ उठाइसकेको र लगानी जुटाउने क्रम जारी रहेको जनाएका छन् । केही महिनापछि पावरहाउसको काम सुरु गरिने र आगामी १६ महिनाभित्र सम्पूर्ण काम सम्पन्न गरी विद्युत केन्द्रीय प्रसारण लाइनमा जोडिने अध्यक्ष पुनले जानकारी दिए ।