समाधान संवाददाता
पोखरा

कोरियन कम्पनी कियाका विद्युतीय गाडी बिक्री गर्दै आएको एस ओभरसिज शिवचोकले नयाँ मोडलको गाडी भित्र्याएको छ । अत्याधुनिक सुविधा भएको नयाँ किया निरो गाडी बजारमा आउनुअघि नै १० वटा बुकिङ भइसकेका छन् । पछिल्लो समय इलेक्ट्रिक गाडीमा उपभोक्ता र सरकारको आर्कषण बढ्दै गएकाले कम्पनीले सर्वाधिक रेन्ज प्रदान गर्ने इलेक्ट्रिक कार बजारमा ल्याएको हो ।

६४ किलोवाट क्षमताको यसको ब्याट्री एक पटक पूर्ण चार्ज गरेपछि ४ सय ८० किलोमिटर गाडी चल्ने कम्पनीले जनाएको छ । ब्याट्रीमा ७ वर्ष ग्यारेन्टी र ३ वर्ष ओभरअल वारेन्टी छ । कियाले देशका मुख्य ६ सहरमा चार्जिङ स्टेसनसमेत राखिसकेको छ । विश्वमा नै विद्युतीय गाडीको प्रयोगलाई प्राथमिकता दिन थालिएको परिवेशमा पोखरामा यसको बजार उत्साहजनक रहेको एस ओभरसिजका सञ्चालक विनय थापाले बताए ।

यसमा दिइएको १ सय ५० किलोवाटको इलेक्ट्रिक मोटरले २०१ बिएचपी पावर र ३९५ एनएम–टर्क उत्पादन गर्छ । यो कारले ७.८ सेकेन्डमा शून्यबाट १ सय किलोमिटरको रफ्तार पकड्न सक्ने कम्पनीले दाबी गरेको छ । अगाडिको ग्रिलमा कम्बाइन चार्चिङ सिस्टम दिइएको यो इलेक्ट्रिक एसयुभी डिसी फास्ट चार्जरबाट ८० प्रतिशत चार्ज गर्न ७५ मिनेट लाग्नेछ । यो गाडीको नेपाली बजारमा प्रवेशपछि सर्वाधिक माइलेज दिने इभीमा पर्नेछ ।

६४ लाख ९९ हजार पर्ने यो गाडी ६ वडा विभिन्न रंगमा उपलब्ध छ । लन्च डिस्काउन्टको रुपमा अहिले गाडीमा १ लाख रुपैयाँ छुट दिइएको छ ।