फेवाताल फराकिलो पार्न कस्सियो महानगर

समाधान संवाददाता २०७५ माघ १४ गते १६:५४

समाधान सम्वाददाता

पोखरा महानगरपालिकाले सोमबारदेखि फेवातालको खहरे क्षेत्रमा तालमा थुप्रिएको माटो झिक्न सुरु गरेको छ । गण्डकी प्रदेशमा मुख्यमन्त्री पृथ्वीसुब्बा गुरूङले २० हजार घनमिटर माटो हटाउन लागेको बताए ।

सर्वोच्च अदालतको फैसला कार्यान्वयन गर्न लागेको जनाउँदै उनले हाल पहिलो चरणको काम सुरु गरेको बताए ।

महानगरले पहिलो चरणमा खहरे र फिर्के जोडिएको ठाउँबाट माटो निकाल्न लागेको हो। खहरे र फिर्के क्षेत्रबाट काम सुरु गरेको बताउँदै महागरका मेयर मानबहादुर जिसीले भने, फेवा संरक्षणमा प्रदेश सरकारले चासो राखेको बताए ।

अधिवक्ता खगेन्द्र सुवेदीले २०६७ माघ १० गते दायर गरेको रिटमाथि अध्ययन र बहस गरेर ओम प्रकाश मिश्र र सपना प्रधान मल्लको इजलासले गएको पुस महिनामा फेवाताल अतिक्रमण गरी निर्माण भएका संरचना भत्काउन आदेश दिएको थियो।

अहिले गठन भएको एक्सन कमिटीले ६ महिनाभित्रै सर्वोच्चको फैसला कार्यान्वयन गर्नुपर्ने छ।

तत्कालिन समयमा विश्वप्रकाश लामिछाने संयोजकत्वको समितिले करिब ९ सय ५० जना व्यक्तिको लालपूर्जा नै खारेज गर्नुपर्ने सिफारिस गरेको थियो। १ हजार ६ सय ९२ रोपनीभन्दा बढी जग्गा विभिन्न व्यक्तिले आफ्नो नाममा दर्ता गरेको प्रतिवेदनमा उल्लेख छ।

२०१८ सालमा १० वर्गकिलोमिटरमा फैलिएको फेवाताल २०६४ मा आईपुग्दा ४ दशमलव २० वर्गकिलोमिटरमा खुम्चिएको तथ्यांक छ।

तपाईको प्रतिक्रिया