हत्यारा पहिचान गरी कारबाहीको माग गर्दै प्रदर्शन

समाधान संवाददाता २०७५ चैत ९ गते ९:३९

स्याङ्जा, समाधान संवाददाता

पुतलीबजार १ का २५ वर्षीय सिसोक गुरुङको हत्यारा पहिचान गरी कानुनी कारबाहीको माग गर्दै स्थानीयबासी र आफन्तजनले पुतलीबजार नगरपालिकामा प्रदर्शन गरेका छन् ।

प्रदर्शनपश्चात् प्रशासन कार्यालय पुगी प्रमुख जिल्ला अधिकारी कोषहरि निरौलासँग पीडित परिवारले छोराको मृत्यु पश्चात न्याय माग्दा आफूहरु असुरक्षित भएको बताए ।

मृतकका बुबा ८२ वर्षीय विष्णु गुरुङले राति राति मोटरसाइकलमा आएर थर्काउने गरेको बताउँदै प्रशासन गुहार्नुपरेको उल्लेख गरे । प्रजिअ निरौलाले अबको दिनमा कोही धम्काउन आएमा प्रशासनलाई खबर गर्न आग्रह गर्दै दोषी कोही नछुट्ने प्रतिबद्धता जनाए ।

नारायणस्थानस्थित भाडामा बस्दै आएका गुरुङ फागुन १९ गते पुतलीबजार नगर पालिका सतौं जाने बाटोको पक्की पुलमुनि अचेत अवस्थामा भेटिएका थिए । उनको उपचारका क्रममा घटनाको २ दिनपछि मणिपाल अस्पतालमा निधन भएको थियो ।

मादक पदार्थ सेवन गरी झगडा गरेर कुटपिट गरी पुलमुनि फालिदिएको भन्ने परिवारको उजुरीका आधारमा ज्यान मार्ने उद्योगमा ४ जनालाई प्रहरीले पक्राउ गरेको थियो । पक्राउ परेका पुतलीबजार १ का हिमप्रसाद गुरुङ, रोशन थापामगर, ज्ञान सिं ठकुरी र पुतलीबजार १४ का सफल भण्डारीलाई हिरासतमा राखी अनुसन्धान भइरहेको छ ।

तपाईको प्रतिक्रिया