बाटामा अलपत्र मजदुरलाई मोदीका युवाहरुद्वारा घर पुर्याउने प्रयास
फोटो–डिमुवामा खाना खाँदै पैदल हिडेका मजदुर
समाधान संवाददाता
लकडाउन लम्बिएपछि घर पैदल नै घर फर्कने मजदुरहरुको बाटो मै बिचल्ली भएको खबर आइरहेका छन् । घर फर्कने प्रयास गर्दा त्यस्तै बिचल्लीमा परेका मजदुरहरुलाई पवर्तको मोदी गाउ पालिकाका युवाहरुले सहयोग गरिरहेका छन् ।
पैदल हिडेर पश्चिम जान हिडेका सयौं जनाको उद्धार गरेको पवर्त तिलाहरका स्थानीय युवा तथा पोखरा टाइगर गु्रपका कोषाध्यक्ष हरि श्रेष्ठले जानकारी दिए ।
कालिगण्डकी करिडोर लगायतका विभिन्न आयोजनामा काम गर्न खटिएका सयौं मजदुर लामो समयसम्मको अन्यौलका कारण घर फर्कन लागेका हुन ।
तिनै मजदुरलाई लक्षित गरेर डिमुवा बजारमा निशुल्क खानाको व्यवस्था गरिएको छ । ‘धेरै जसो मजुदुर त भोक भोकै आएका छन ।’ श्रेष्ठले समाधानसंग भने–उनीहरुलाई डिमुवामा खाना खुवाउने व्यवस्था गरेका छौं । हरेक दिन दुई छाक नै खाना पकाइरहेका छौं ।’
त्यहाँ खाना खाएपछि जिल्लाको सिमानासम्म पुर्याउने व्यवस्था मोदी गाउपालिकाले गरेको छ । गाउपालिकाले एउटा बस नै रिजर्व गरेर बाग्लुङ, कास्कीको सिमानासम्म पुर्याईदिने गरेको पनि उनले बताए । उनका अनुसार अन्य जिल्लाका सुरक्षाकर्मी र उद्योग बाणिज्यसंघसंग सहकार्य गरेर पैदल हिडेका मजदुरहरुलाई गृह जिल्लासम्म पुर्याउने व्यवस्था समेत मिलाइएको छ ।
कतिपय मजदुरहरु राजमार्गमा हिड्दा प्रहरीले रोक्छ भन्दै गाउ गाउ हिडेको भन्दै उनीहरुले त्यसो नगर्न पनि आग्रह गरेका छन । ‘सकेसम्म नहिड्नुहोस, हिडिसक्नु भएको छ भने डिमुवा हुँदै आउनुहोस खाना खुवाउने र सकेसम्म तपाईलाई गाडी मै पठाउने व्यवस्था गर्छौ ।’ श्रेष्ठले आग्रह गरे ।
तपाईको प्रतिक्रिया