लेखनाथका ४ वडामा बोरिङको पानी वितरण गर्ने तयारी, २ महिना महशुल नलिइने

समाधान संवाददाता २०७७ जेठ ३ गते १४:०९

रामशरण नेपाली, लेखनाथ

लेखनाथ साना शहरी खानेपानी तथा सरसफाई उपभोक्ता संस्थाले पहिलो सह–लगानी खानेपानी तथा सरसफाइ आयोजनाका उपभोक्तालाई धारा वितरण कार्य शुरु गरेको छ ।

पोखरा–२६ भवानीकालिका मावि स्थित बोरिङबाट निकालिएको पानीलाई १ हजार १ सय ९४ मिटर उचाइमा लिफ्ट गरी ४ वटा ट्याङ्कीमार्फत पोखरा २६, २७, २८ र ३१ नं. वडाका पहाडी बेल्टमा पानी वितरण गर्न लागिएको हो ।

पहिलो चरणमा बिहिबारबाट शुरु गरिएको धारा वितरणबाट ७ सय बढी घरपरिवार लाभान्वित हुनेछन् । धारा जडानपछि २ महिना परीक्षण अवधि रहने र यस अवधिमा पानीको महशुल नलिइने लेखनाथ साना शहरी खानेपानी तथा सरसफाइ उपभोक्ता संस्थाका अध्यक्ष विष्णुप्रसाद बरालले जानकारी दिए ।

आयोजनाअन्र्तगत पूर्वमा लामास्वारा, पश्चिममा टाईगर टप, दक्षिणमा अर्चले र साविक लेखनाथको वडा नं.५ का भागमा करिब २५ सय घरधुरीका उपभोक्ताहरुलाई सहज रुपमा खानेपानी वितरण गर्ने संस्थाको उदेश्य रहेको अध्यक्ष बरालले बताए ।

धारा जडानको लागि पोखरा–२६ पिपलसारेमा रहेको कार्यालयमा अन्तिम किस्ता बुझाउन सकिने र जडानका सामग्रीहरु उपलब्ध हुने गरी व्यवस्थापन मिलाईएको संस्थाले जनाएको छ ।

२०७४ साल असार २८ गतेबाट सुरु भएको आयोजना अन्तिम चरणमा रहेको र ९५ प्रतिशत काम पुरा भएको छ । नेपाल सरकारको ७० प्रतिशत र उपभोक्ताको ३० प्रतिशत लगानी रहेको सह–लगानी आयोजनामा पुर्व सांसद यज्ञबहादुर थापा र हालका संघीय सांसद खगराज अधिकारीले सांसद विकास कोषमार्फत सहयोग गरेका छन् ।

आयोजना सञ्चालनमा आउँदा उपभोक्ताहरुले प्रतिव्यक्ती ७५ लिटरका दरले २४ सै घण्टा पानी उपभोग गर्न पाउने लेखनाथ साना शहरी खानेपानी तथा सरसफाई उपभोक्ता संस्थाले जनाएको छ । धारा वितरण शुभारम्भ कार्यक्रममा संघीय कार्यालयका इञ्जिनियर कुलप्रसाद पौडेलले खानेपानीको लागि प्रयोग गरिने विद्युत महशुलमा राज्यले सहुलियत दिनुपर्ने बताए ।

यस्तै लेखनाथ उद्योग वाणिज्य संघका द्धितीय उपाध्यक्ष राजेन्द्र ओझाले ग्रामिण क्षेत्रमा रहेको पानीको समस्यालाई सम्बोधन गरेकोमा संस्थालाई आभार व्यक्त गरे । संस्थाका अध्यक्ष विष्णुप्रसाद बरालको अध्यक्षतामा सम्पन्न कार्यक्रमको सञ्चालन सचिव मुरारी शर्माले गरेका थिए ।

तपाईको प्रतिक्रिया