एजेन्सी

क्यारेबियन प्रिमियर लिग (सीपीएल) २०२० मा नेपाली खेलाडी सन्दीप लामिछाने उत्कृष्ठ प्रदर्शनका वावजुद उनकाे टिम विजयी हुन सकेन ।

सन्दिप सहितका बलरले राम्राे प्रदर्शन गरेपनि जमैकाका ब्याट्सम्यानले राम्राे खेल्न नसक्दा टिम लगाातार २ खेलमा पराजित भएकाे छ ।

सन्दिपले ४ अाेभर बलिङ गरेर ८ रन खर्चदै २ विकेट चट्काएका थिए । यो सन्दीपले अहिलेसम्म खेलेको विदेशी लिगहरुमा सबैभन्दा किफायती बलिङ हो । तर उनकाे प्रदर्शन हारकाकारण फिका बन्याे ।

सन्दीपसहित मुजिर उर रहेमान र कार्लोस ब्रेथवेइटको उत्कृष्ट बलिङ अनि आन्द्रे रसेलले उत्कृष्ट ब्याटिङ गरेपनि जमैका गायना अमेजन वारियर्ससँग १४ रनले पराजित भएको हो ।

उत्कृष्ट बलिङ गर्दै गायनलाई ११८ रनमा रोकेको जमैकाले रसेलको अर्धशतकका बाबजुत पनि सामान्य लक्ष्य पूरा गर्न सकेन ।

जमैकाले निर्धारित २० ओभरमा ७ विकेट गुमाएर १०४ रन मात्र बनाउन सक्यो । रसेलले ३७ बल खेल्दै ४ चौका र ५ छक्काको मद्दतमा ५२ रन बनाए पनि जितका लागि पर्याप्त हुन सकेन । यस्तै  कप्तान रोभमन पावेलले २३ र असिफ अलीले १४ रन बनाए ।

गायनाका कप्तान क्रिस ग्रीनले ३ ओभरमा १ मेडन राख्दै १० रन खर्चेर २ विकेट लिए ।

त्यसअघि ब्रायन लारा क्रिकेट एकेडेमी मैदानमा टस हारेर पहिले ब्याटिङ गरेको गायाना ५ बल अगावै १८ रनमा अलआउट भएको थियो । गायनाको लागि ओपनर ब्राण्डन किंगले २९ रन बनाए । यस्तै चन्द्रपउल हेमराज र निकोलस पुरनले समान २१ रन जोडे ।

जमैकाका लागि मुजिव र ब्रेथवेइटले ३–३ विकेट लिए भने सन्दीपले किफायती बलिङ गर्दै २ विकेट लिए ।

मुजिवल ४ ओभरमा १८ रन खर्चिँदा ब्रेथवेइटले ३.१ ओभर बलिङ गर्दै १४ रन खर्चे ।

यस सिजन लगातार दोस्रो हार व्यहोरेको जमैका ३ खेलबाट २ अंकसहित अंकतालिकामा पाँचौ स्थानमा छ । पहिलो खेलमा सेन्ट लुसिया जुक्सलाई पराजित गरेको जमैका दोस्रो खेलमा ट्रिनबागो नाइट राइडर्ससंग पराजित भएको थियो ।