कांग्रेस नेतृत्वको सरकार बनाउने बाटो खुला

समाधान संवाददाता २०७८ जेठ २८ गते ७:०९

अब प्रदेश प्रमुख सीताकुमारी पौडेलले संविधानको १६८ (५) बमोजिम सरकार गठनका लागि आह्वान गर्नेछिन्

समाधान संवाददाता, पोखरा

गण्डकी प्रदेशका मुख्यमन्त्री पृथ्वीसुब्बा गुरुङले विश्वासको मत पाउन असफल भएका छन् । ६० सदस्यीय गण्डकी प्रदेश सभाका २७सांसदले उनलाई विश्वासको मत दिएका छन् । अविश्वासमा ३० र तटस्थमा १ मत खसेको छ । सरकारका युवा तथा खेलकुद मन्त्री बनेका सांसद दीपक मनाङे अनुपस्थित रहे । जनमोर्चाका कृष्ण थापाले तटस्थमा मत हाले ।

अब प्रदेश प्रमुख सीताकुमारी पौडेलले संविधानको १६८ (५) बमोजिम सरकार गठनका लागि आह्वान गर्नेछिन् । कुनै एक सांसदले आफूसँग बहुमत भएको दाबी गर्दै प्रदेश प्रमुखकहाँ गएपछि नयाँ सरकार गठन हुनेछ । यसरी गठन हुने नयाँ सरकारले पनि ३० दिनभित्र विश्वासको मत लिनुपर्ने संवैधानिक व्यवस्था छ ।

गुरुङले विश्वासको मत नपाएपछि अब कांग्रेस नेतृत्वको सरकार बनाउने बाटो खुलेको छ । कांग्रेसका १५, माओवादीका ११ (सभामुखबाहेक), जनमोर्चाका ३, जसपाका २ सहित स्वतन्त्र १ जनाको मत पुग्दा कांग्रेस नेतृत्वको सरकार बन्न सक्छ । त्यति सांसद हुँदा ६० सदस्यीय प्रदेश सभाका बहुमत सांसद हुन्छन् ।

यसअघिदेखि नै कांग्रेस नेतृत्वको गठबन्धनका ४ दल गुरुङ सरकार ढालेर कांग्रेसको सरकार बनाउन लागेका थिए । कृष्णचन्द्र नेपाली पोखरेललाई मुख्यमन्त्री प्रस्ताव गरेर यो गठबन्धनले अविश्वास प्रस्तावसमेत ल्याएको थियो । २ वैशाखमा अविश्वास प्रस्ताव प्रदेश सभा सचिवालयमा पेस भएको थियो ।

तर अविश्वास प्रस्तावमा मतदान हुन पाएको थिएन । १५ वैशाखको बैठकमा मतदान हुने कार्यसूची भएपनि जनमोर्चाका सांसद खिमविक्रम शाही अनुपस्थित भएपछि सभामुख नेत्रनाथ अधिकारीले बैठकलाई अनिश्चितकालका लागि स्थगित गरिदिएका थिए । पछि कार्यव्यवस्थाको बैठकले २७ वैशाखमा अविश्वासमा मतदान हुने निर्णय गरेको थिया । मतदान हुनु एक दिनअघि मुख्यमन्त्री गुरुङले राजीनामा दिएर मार्ग प्रशस्त गरेका थिए ।

प्रदेश प्रमुख पौडेलले ३ दिनभित्र बहुमत दाबी गरेर आउन विपक्षीलाई समय दिएपनि उनीहरु जान सकेनन् । र ठूलो दलको नेताको हैसियतले मुख्यमन्त्रीमा पृथ्वीसुब्बा नै दोहोरिएका थिए । २९ वैशाखमा दोस्रोपटक मुख्यमन्त्री नियुक्त भएका गुरुङले १ महिनामा विश्वासको मत लिनैपर्ने संवैधानिक बाध्यताका कारण बिहीबार विश्वासको मागेका थिए ।

विश्वासको मत नपाएपछि मुख्यमन्त्री पृथ्वीसुब्बा गुरुङले आफूहरु संविधानले दिएको बाटोबाट बढ्ने बताए । कांग्रेस संसदीय दलका नेता तथा प्रस्तावित मुख्यमन्त्री कृष्णचन्द्र नेपाली पोखरेलले आफूहरु बहुमत लिएर प्रदेश प्रमुखकहाँ जाने दाबी गरे । प्रदेश प्रमुखले संविधानको १६८ (५) बमोजिम सरकार गठनका लागि आह्वान गरेपछि आफूहरु बहुमत साथ जाने उनको भनाइ थियो । ‘प्रदेश प्रमुखले बोलाएपछि हामी बहुमतसहित जान्छौं,’ पोखरेलले भने ।

माओवादी सांसद लेखबहादुर थापाले आफूहरुसँग ३१ सांसदको हस्ताक्षर रहेको दाबी गर्छन् । ‘यो पटक हामीले हस्ताक्षर सहित दाबी लैजान्छौं । बहुमत सांसदको हस्ताक्षर जुटाइसकेका छांै,’ उनले भने ।

कृष्ण थापा भन्छन्ः कारबाही नहोला

राष्ट्रिय जनमोर्चा सांसद कृष्ण थापा आफूमाथि कारबाही नहुने बताउँछन् । अदालतमा आफूविरुद्धको मुद्दा विचाराधीन रहेकाले आफूमाथि थप कारबाही हुन नसक्ने उनको धारणा छ । पार्टी ह्विप विपरीत सांसद थापाले विश्वासको मत दिनेबेला तटस्थमा मत हालेका थिए । आफूलाई पार्टीले पृथ्वीसुब्बालाई मत नदिन भनेकाले तटस्थमा मत हालेकोले ह्विप पनि उल्लंघन नभएको उनको तर्क छ । ‘पृथ्वीसुब्बालाई साथ नदिन भनेकाले तटस्थमा हालें ।

ह्विप उल्लंघन भएको छैन । कारबाही पनि किन होला र ? अदालतमा विचाराधिन मुद्दा छ,’ थापाले भने ।

यता जनमोर्चाकी सांसद पियारी थापा भने कृष्ण थापालाई पार्टीले कारबाही गर्ने बताउँछिन् । कृष्ण थापाले ह्विप उल्लंघन गरेकाले उनीमाथि कारबाही हुने थप आधार जुटेको पियारी बताउँछिन् । ‘हामीले ह्विप जारी गर्दै तटस्थमा पनि मत नहाल्न भनेका थियौं, उहाँले उल्लंघन गर्नुभयो, कारबाही हुन्छ,’ पियारीले भनिन् ।

तपाईको प्रतिक्रिया