पोखरा । साविक विजेता कर्णाली यशविस र उपविजेता ललितपुर क्विन्सले वात्सल्या एभरेस्ट महिला भलिबल लिग (इडब्लुभी) मा लगातार तेस्रो जित हात पारेको छ ।
पोखरा रंगशाला स्थित बहुउद्देश्यीय कभर्डहलमा सोमबार भएको खेलमा कर्णालीले काठमाडौं स्पाइकर्सलाई ३–० को सोझो सेटमा पराजित ग¥यो । कर्णालीले पहिलो सेट २५–२२, दोस्रो सेट २९–२७ र तेस्रो सेट २८–२६ ले जित निकाल्यो । कर्णालीकी आना फ्लाभिया प्लेयर अफ द म्याच घोषित भइन् ।
कर्णालीले यसअघि पोखरा निन्जाज र लुम्बिनी लाभाजलाई पराजित गरेको थियो । जितसँगै कर्णालीले ९ अंक जोडेर शीर्ष स्थानमा छ । काठमाडौंले दोस्रो हार बेहोरेको छ । पहिलो खेलमा ललितपुर क्विन्ससँग पराजित भएको थियो । दोस्रो खेलमा भने काठमाडौंले मधेस युनाइटेडलाई हराएको थियो ।
दोस्रो खेलमा लुम्बिनी लाभाजलाई ३–० को सोझो सेटमा पराजित गर्दै ललितपुर शीर्ष स्थानमा उक्लिएको छ । ललितपुरले पहिलो सेट २५–१३, दोस्रो सेट २५–२० र तेस्रो सेट २५–२१ ले आफ्नो पक्षमा पा¥यो । ललितपुरकी पट्राथिप सान्त्रकुन प्लेयर अफ द म्याच बनिन् । लगातार तेस्रो जितसँगै ललितपुर ९ अंकसहित फाइनल नजिक पुगेको छ ।
ललिलपुरले पहिलो खेलमा मधेश युनाइटेड र दोस्रो खेलमा काठमाडौंलाई हराएको थियो । ललितपुर र कर्णालीको समान अंक भए पनि लुम्बिनी लाभाजसँगको खेलमा कर्णालीले १ सेट गुमाएकाले दोस्रो लिग तालिकाको दोस्रो स्थानमा धकेलिएको हो ।
प्रतियोगिताको चौथो दिनसम्म आइपुग्दा घरेलु टिम पोखरा र लुम्बिनी उपाधि होडबाट बाहिरिएका छन् । ३ खेलबाट २ अंक जोडेको लुम्बिनी र लुम्बिनीसँग नै १ अंक खोसेको पोखरा निन्जाजको २ खेलअघि नै फाइनल नपुग्ने निश्चित भएको हो । यी दुईका अबका खेल प्रतिष्ठाका लागि मात्र हुनेछ ।
लिग तालिकामा ३ अंक जोडेका मधेस युनाइटेड र काठमाडौं स्पाइकर्सको फाइनल खेल्ने गणितीय सम्भावना बाँकी नै छ । दुवै टोलीले २÷२ खेल खेल्न बाँकी छ ।
इन्फनिटी ड्रिम्स प्रालिको आयोजनामा जारी लिग भदौ २८ गतेसम्म चल्नेछ । सिंगल राउन्ड रोविनका आधारमा हुने खेलमा ६ टिमको सहभागिता छ । भदौ २६ गतेसम्म लिग चरणका खेल हुनेछन् । २७ गते रेस्ट डे अनि २८ गते लिगको पहिलो र दोस्रो स्थानमा हुने टिमले उपाधिका लागि प्रतिस्पर्धा गर्ने छन् ।
लिगअन्तर्गत मंगलबार २ खेल हुनेछन् । पहिलो खेल कर्णाली र मधेसबिच दिउँसो २ बजे सुरु हुनेछ । त्यसपछि ललितपुर र पोखराबिचको खेल हुनेछ ।