अनुप पौडेल, पाेखरा

पोखरामा एकै परिवारका ४ जनामा कोरोना संक्रमण पुष्टि भएको छ । प्रदेश क्षयरोग उपचार केन्द्रमा गरिएको परीक्षणमा पोखरा ८ बस्ने परिवारमा कोरोना संक्रमण पुष्टि भएको हो । संक्रमित ४ जना मध्ये २ बालक र २ जना वृद्धवृद्धा छन् ।

संक्रमण पुष्टि हुने ४ जना तनहुँको १ गाउँपालिकाका *अधिकृतकाे परिवारका सदस्य हुन् । संक्रमण पुष्टि हुनेमा अधिकृतका ८२ वर्षे बुवा, ७२ वर्षे आमा, ७ र १४ वर्षका छोरा छन् । उनकी श्रीमतीको रिपोर्ट भने नेगेटिभ आएको छ ।

काठमाण्डौंबाट फर्केका उनी कोरोना परीक्षणका लागि स्वाब दिएर घरमै क्वारेन्टाइनमा बसेका थिए । उनले १४ साउनमा आफ्नो स्वाब दिएका थिए । ३ दिनपछि रिपोर्ट आउँदा कोरोना भाइरस संक्रमित भएको पुष्टी भएको थियो । अहिले पनि उनी घरमै सेल्फ आइसोलेसनमा बसेको स्रोतले बतायो ।

उनको कन्ट्याक ट्रेसिङमा परेपछि परिवारका सदस्यको ४ दिन पहिले स्वाब लिइएको थियो । उनी गंगालाल राष्ट्रिय हृदय रोग उपचार केन्द्रमा उपचाररत् बिरामी आफन्त भेटेर फर्किएका थिए ।

*सच्चाइएको । संक्रमितको गोपनियतालाई ध्यानमा राख्दै नाम हटाइएको छ । प्रकाशित समाचारमा नाम उल्लेख हुँदा संक्रमित, परिवार र आफन्तमा पर्न गएको असहजताका लागि क्षमाप्रार्थी छौं । – सम्पादक