समाधान संवाददाता
पोखरा

कास्कीकाे मादी ४ घामनुङका करिब ७८ वर्षीय १ वृद्धको खुकुरी प्रहार गरी हत्या भएको छ । सामान्य भनाभनपछि नाताले भतिज पर्ने नवराज सापकोटाले शनिबार साँझ साढे ७ बजेतिर काका पर्ने पिताम्बर सापकोटामाथि खुकुरी प्रहार गरेका थिए ।

पिताम्बरको घटनास्थलमै मृत्यु भएको मादी ४ का अध्यक्ष सत्यराज सापकोटाले जानकारी दिए । खुकुरी प्रहारबाट अर्का १ वृद्धको टाउकोमा गम्भीर चोट लागेको छ । घाइते केशवराज सापकोटाको मणिपाल अस्पतालमा उपचार भइरहेको वडाध्यक्ष सापकोटाले जानकारी दिए ।

खुकुरी प्रहारपछि हार गुहार हुँदा घटनास्थल पुगेका केशवराजमाथि पनि नवराज जाइलागेका थिए ।

खुकुरी प्रहार गरी १ को हत्या र १ लाई घाइते बनाएका नवराज राति नै घरबाट भागेका थिए । भाग्ने प्रयास गरेका नवराजलाई पोखरातर्फ आउँदै गर्दा जिल्ला प्रहरी कार्यालय कास्कीको टोलीले पक्राउ गरेको छ ।

नवराजविरुद्ध किटानी जाहेरी दर्ता गरिएको वडाध्यक्ष सापकोटाले बताए । वडाध्यक्ष सापकोटाले राति नै इलाका प्रहरी कार्यालय डाँडाको नाक र जिल्ला प्रहरी कार्यालय कास्कीलाई घटनाबारे जानकारी गराएका थिए । ‘बेलुका नै घर छोडेर हिँडेका नवराज फरार हुनसक्ने सम्भावना देखेपछि प्रहरीलाई खबर गरेँ, नत्र भाग्ने रहेछ ।’ वडाध्यक्ष सापकोटाले भने ।

शव पोस्टमार्टमका लागि पश्चिमाञ्चल क्षेत्रीय अस्पतालमा राखिएको छ ।

कास्की प्रहरी टोली मुचुल्का उठाउन घटनास्थलतर्फ लागेको छ । घटनास्थलको मुचुल्का आएपछि पोस्टमार्टम गरी अन्त्यष्टि गरिने वडाध्यक्ष सापकोटाले बताए ।

तस्बिर : घाइते केशवराज सापकाेटा