समाधान संवाददाता, पोखरा ।

दिउसो ३ बजेतिर जिल्ला प्रहरी कार्यालय कास्कीको कन्ट्रोल रुममा फोन आयो । एउटी महिला रुदै भन्दै थिइन– मलाई शसस्त्रको एसएसपीले बलात्कार गर्‍याे । खाना खान बोलाएर जबरजस्ती गर्‍याे ।

फोन उठाउने प्रहरीलाई के गरौं र कसो गरौं भयो । उनले तत्कालै आफ्ना कार्यालय हाकिम एसपी जीवनकुमार श्रेष्ठलाई फोनमा आएको विवरण सुनाए । अनि तत्कालै ती महिला भएको ठाउमा प्रहरी परिचालन भयो । लगत्तै एसएसपी अधिकारीले बलात्कार गरे भन्ने आरोप लगाउने युवती फेला परिन् । उनलाई मेडिकल गर्न पठाउने आदेश दिएर एसपी श्रेष्ठले वडा प्रहरी कार्यालय रामबजारका इन्स्पेक्टरको नेतृत्वमा प्रहरी टोली लामापाटन पठाए ।

तर अधिकारी भेटिएनन् । फेरि एसपीले जिल्ला प्रहरी कार्यालय कै डिएसपीको नेतृत्वमा अर्को टोली पठाए । एएिसपी अधिकारी गायव नै थिए । उनको पिएसओलाई पनि उनी कहाँ छन् थाहा थिएन ।

गाडी भित्रै छ, मान्छे छैनन् । फिल्डमा खटिएको दुवै टोलीले एसएसपी अधिकारी फेला नपरेको रिपोर्टिङ गरे । सशस्त्र प्रहरी बलका उपल्लै स्तरका अधिकारीमाथि यस्तो गम्भीर आरोप लागेपछि एसपी श्रेष्ठले आफूभन्दा माथिको निकायमा खबर गर्न व्यस्त थिए । तर अधिकारी फेला परेनन् भने पछि अर्को तनाव सुरु भयो ।

लगत्तै गण्डकी प्रदेशका प्रदेश प्रमुख डिआइजी घनश्याम अर्यालले एसपी श्रेष्ठलाई आफै फिल्डमा जान आदेश दिए । एसपी श्रेष्ठ लामापाटनमा पुग्दा सशस्त्र प्रहरीका प्रदेश प्रमुख डिआइजी कविन्द्रमान श्रेष्ठ पनि लामापाटन पुगिसकेका थिए ।

तर बलात्कारको अभियोग लागेका एसएसपी अधिकारी वेपत्ता नै थिए । त्यहाँ कार्यरत प्रहरीलाई सोधपुछ गर्दा उनी गेट बाहिर नगएको पुष्टि भयो ।

लामापाटनको क्षेत्र ठूलो छ र झाडी पनि छ । त्यसैले प्रहरीले उनको खोजी क्वाटर भन्दा बाहिर गर्न थाले । त्यसै क्रममा उनी झाडीमा लुकेर बसेको अवस्थामा पक्राउ परे ।

तत्काल उनलाई नियन्त्रणमा घटनाको मुचुल्का उठाउने काममा एसपी सहितको टोली खटिएको छ ।

‘अहिले उहाँ नेपाल प्रहरीको नियन्त्रणमा हुनुहुन्छ । बयान लिने काम भएकै छैन ।’ एसपी श्रेष्ठले समाधानसँग भने–घटनास्थलको अनुसन्धान गर्दैछौं ।

याे पनि

एसएसपीको बलात्कार काण्ड–युवती चितवनकी, खाना खाने निम्तो, दिउसै बलात्कार

सशस्त्रका एसएसपी राजेन्द्र अधिकारी बलात्कार आराेपमा पक्राउ